Salamat
Sa pagpamati
Naman-an ko
Bisan wara kaw
Gasabat
Nabatian mo ako.
Wara
Kaw gid nagariklamo
Sa bisan ano
Nga hambalun ko
Masinggit man
Ukon
Maghani sa
Talinga mo
Bisan sangka
Tinaga
Wara gid ko
Ti may nabatian
Kanimo.
Piro
Salamat gid
Hay tanan nga
Nagasipal sa akun
Paminsarun
Mapautwas ko
Kanimo.

Diin
Sa lupa
Makita
Ang langit?
Wara man
Ti bitoon
Kag bulalakaw
Nagalabay
Sa akun
Kilid
Puro
Man lang
Dya
Bagrut
Kag ugayung
Akun nabatian.
Siguro
Sa lupa
Impyirno
Lang ang makita.

Dali
Takas run
Mahapdi run sa panit
Ang sirak ka adlaw
Kag ang balud
Daragkul run man.
Wara mo gid haw
Mabatyagan
Ang sakit
Kon ilampus
Ikaw ka balud
Sa daray-ahan?
Ukon
Pirit mo lang
Nga ipanagitlun
Ang hapdus ka asin
Kag init ka singkal
Ka adlaw sa imo
Kalawasan.
Kon imo pa madumduman
Ginsaysay mo kato
Sa gisiun nga papil
Ang pagturo ka
Uran
Sa hayubhayub
Nga payag
Nga imo ginaistaran
Saksi pa ang
Tinta nga imo
Gingamit
Sa pagpautwas
Ka imo panghakruy.
Abi ko
Tapos run to.
Daw indi ako
Makapati.
San-o pa timo
Matakas sa paglangoy
Mas mapait pa
Sa baybay ka Taringting
Ang imo ginalanguyan
Siguro
Sa imo pagsalum
Nagalaum
Gid ikaw
Nga sa imo pagbutwa
Indi mo run
Mabatyagan ang hapdi
Ka asin
Nga nagaparupsup
Sa imo kalawasan
Kag indi run man
Magpait ang baybay.