Duro gid nagabais kon diin ang manami
Kon mugut ukon labug ang magpapili?
Diin sanda malipay sa adlaw kag gabii?
Abi ko ano run, amo man lang ran gali.

Hambal ka iba mas manami ang mugut
Indi tanda mabudlayan kay dali lang malab-ot
Kon maumpisahan pwidi mapahinayan
Bisan pahuwayan asta lang matapos.

Pay nami gid kuno kon tama ka labug
Parapaayunan lang, pira gid maghalog
Araagwanta lang ugaring hay kis-a masakit
Sa sobra ka buhay, panghayhay masambit.

Kadlaw lang takun sa mga nagasuruay
Indi gid magpapyirdi kon magbinaisay
Ano gid kon mugut ukon labug ran tana
Importanti kabatyag kamo tanan kalipay.

Hay ang kabuhi malabug man ukon mugut
Diin mo gingamit, amo ran ang pamangkot
Parihas dya ka dalagan, paunauna lang ta
Basi pa lang kaluy-an, abtanay ta sa punta.

Abi ko sa suba lang sanda nagalutawlutaw
Kin kis-a masal-an daw kahoy nga nagalabaw
Nagatika, nagalangoy, kon maghulag tama ka hinay
Nagahulat lang ka turukmuun, mayad gid magbantay.

May dyan man ang iba sa zoo makita
Ginabiribisitahan labi run gid ka mga bata
Hay daw istatwa lang kon magpakuribung
Kon magmisuk ang mata, kuno wara ti labut.

Piro mas mahangyus ikaw hay indi lang
Sa suba ukon zoo sanda nagarapta
Hay may dyan ang iba
Sa palibot mo lang masugata
May nagapungko sa pwisto, konggriso, sinado
Sa gobyirno nagapahunayhunay.

May nagapakunokuno man, madamul ti gawi
Imbis magsirbisyo, sa pagpanakaw nawili
Ang bulsa ginabuta ka papilun kag sinintimos
Wara gid mahuya, sa manggad nagapakalumus.

Amo sanda ka dya ang natawag nga buaya
Abi mo tuod sa zoo ukon sa suba lang makita
Gani mag-andam ta sa kapariho nanda
Basi kita makagat, mahalitan ka buaya.