​Naobos run ang mga inadlaw sa pagsagap ko kanimo
Kaina kita ko nga may nagaistorya kanimo
Daan nga kabohi, hambal mo.
Kag may nag-abot pa gid.
Kag may nag-abot pa gid.
Sarasara ginbaton mo tanda tanan.
Ti, hambal ko gid, i.
Mabalik tanda, sarasara.
Hambal ko gid bay.
Daw klasi ka pagbaton
Ka tatay sa anang bata
Sa sangka istorya sa Libro:
Pagbaton
Nga wara ti pagdohadoha.

Ako ang bag-o mo nga kabohi, hambal mo.
Kada abot ka mga domaan sa kabohi mo
May sangka parti ka lawas ko
Nga magadora.
Kadya sangka mata.
Kar-on sangka talinga.
Dyan kar-on sangka alima.
Didto kar-on sangka kahig.
Wara ti makangiridlis nga pagpaksipaksi ka akun lawas
Kondi wara ti limug nga pagkadora
Daw balanaw nga daw dyan man kaina
Piro kadya wara run.
Daw pagpara ka paghangup nga wara man nasolat.
Gintawag ko ang ngaran mo
Mabatian mo ako:
Hanihani
Ka
Hangin.

​Ang mga gamay nga tawo nagaistar sa dulum, hambal ka mal-am.

Ginhambalan ko ang pakaisa ko, “Sigi boksi ang solo.”
Nag-oran kang kasanag.
“Daw wara man ti pagbag-o,” hambal ko kana.
“Gamay man giyapon kita, kag gamay ang pangabohi.”
“Ti. patya run lang ang solo,” hambal ko liwat kana.
“Wara man ti pagbag-o.”
Ginpati na ako.
Ginpirung ko ang mga mata ko.
Amo man ana.

Ang kadulum magapatobo ka mga bagay nga indi masarangan kang kasanag, hambal ka mal-am.

Nabatyagan ko nga naglabug
Ang akun nga mga alima.
Amo man ang akun mga kahig.
“Nagabahul ako! Nagabahul ako!”
Singgit ko sa pakaisa ko.
Pirit ko tana nga ginapabogtaw
Piro madalum gid ang ana nga panorogon.

Indi tanan nga kasanag para kanimo, hambal ka mal-am.

Kon ako mangkoton
Kon ano ang akun nadumduman
Nagasulud sa paminsarun ko
Ang kasanag ka bolan
Nga amat-amat nga nagakamang sa dingding
Pasulud sa balay
Kasanag nga nagapakita kag nagapamaan
Kon ano gid man ako
Kon wara ang kadulum.

​Nakita ko ginbonggoan ka sarakyan ang koti, kag ginlapakan.
Sa Fx ako nakasakay, gapongko sa too nayon ka draybur.
Ang bayi nga ingud ko nagsinggit, “Para!”
May gintodo.
“Delikadong magbaba riyan!” sabat ka draybur.
 
Nakita ko ginbonggoan ka sarakyan ang koti, kag ginlapakan.
Sa Fx ako nakasakay, gapongko sa too nayon ka driver.
“Sa harap na lang po ng Citibank.” hambal ko.
Kag nagpondo.
May magtataho nga nagabaligya sa bayi.
“Magkano po?” pamangkot ko.
“Twenty-five pesos po,” sabat ka magtataho.
“Isa nga po.”
 
Nakita ko ginbonggoan ka sarakyan ang koti, kag ginlapakan.
Sa Fx ako nakasakay, gapongko sa too nayon ka draybur.
Tanan nagapara. Tanan nagasakay.
Tanan nagapamangkot. Tanan nagasabat.
Tanan nagabakal. Tanan ginabaklan.
Pwira sa koti. Pwira sa koti.
Pwira sa koti nga ginbonggoan.
 
Sa pinsar ko:
Ang koti ginlapakan, nadonot, nagrapta ng lawas, naoranan, nadora, kag nalipatan.
Wara ti nagsapak. Daw sa wara lang.
Sin-o ang nakakita ka koti ngato? Ako lang gid man?
 
Sa pinsar ko:
Ang syodad pwidi mangin mapintas sa mga koti.
Bisan pa siyam ang kabohi mo.
Gani pag-andam.
​

​Kang ona nga panahon,
 May sangka pintor nagpinta ka poti nga pating
 
Piro bag-o magduut ang ponta ka brotsa na sa kanbas
 Kag magdukut ang orihi na nga pintora
 
 Nagholag, nagkudug ang pispis
Nagbahul nga nagbahul, daw higanti
 
Ang anang kapoti
 Ang anang pakpak
 
 Tagadara kang kalinung kag kahilwayan
Sa bog-os nga kalibotan
 
Nagsinadya ang mga tawo, nagpasalamat sa Makaako
 Kag ang bohay nga kalinung naagum kang kalibotan.
 
Kag sa hinali, nadora ang pispis
 Sa kon ano nga kabangdanan
 
 Wara ti nakamaan
Kondi ang pintor lang
 
Kag nagtuyub ang kalibotan
 Sigi tuyub, hala nga tuyub
 
 Kag naglibot sa adlaw
Sigi libot, hala nga libot
 
Kag nagahulat ang kalibotan
 Sigi hulat, hala nga hulat
 
 Sa sangka pintor
Sa bag-o nga pintor
 
Nga magapinta pa gid ka poti nga pating.

Nagbogtaw sa maisug nga dapug
Ang dapug indi run makaagwanta
Ka ana nga dapug
Naggwa sa kaldiro.
Pan-us run ang kan-un.
 
Ang olonan sa ingud ko wara ti marka
Maramig ang katri
Ka pag-isarahanun.
 
Ang mata nagaturuk sa lamisa
May tatlo ka bilog nga tisa
Nga ginkohit ko sa pono natun
Kang nagligad nga adlaw
Ang paborito mo
Nagadonot run.
 
Naghapon ang lagoring
Nga may daw nagasadlab nga kolor
Piro nag-ilis ka bayo
Nahimo labuglabug
Itum okon masiri nga darag
Ano ang kaibahan na?
 
Nag-agto sa kosina
Nagbuul ka tasa
Nagtimpla ka kapi
Naggwa kag nagpongko
Sa paborito mo nga porongkoan
 
Hulatun ko nga magbotlak ang adlaw
Kon may inogbotlak pa.
 
Ang darwa ka alima gasalikup sa tasa
Maghigup ako ka kapi, mainit
Piro antis magduut ang tasa sa akun bibig
Dayon nagramig ang irimnun.
 
Okon nagramig lang
Parihas ka maramig nga hangin
Sa kaagahun nga nagdapya sa alima ko
Nga naghulat sa imo alima.
Dyan pa bala okon wara run?
 
Marapit sa dolonan may nagakamang
Kag nagaparanglambud nga kamoti,
Bag-o nga sahi, kadya ko lang nakita
Anang dahon korti poso, ang doag na daw adlaw
Piro sa anang lawas nakita ko nga may mga olod
Nagakamang, ginakitkit ang anang mga dahon
Sarasara.
​

​Sa Tibiao
Kon sa diin ako nagbahul
Nadumduman ko pa ang karosa nga
Ginabutung kang karbaw ni Lolo.
Ang lao nga nagmantsa sa syorts ko.
Kag ang mga bariri nga nagakapyot
Sa paminsarun.
Sa napiud nga parti ka bayo may ginasabak, kag may ginabagtung nga mga lopoklopok.
Ang damil ka bikabika kag ang katul kon magdukut sa bibig masaboran ko pa.
Tanan nagapagkit, manami nga mantsa sa akun mimorya,
Nagapangamoyo nga di ko gid dapat paglipatan.
Samtang nagahinalup ang adlaw
Ang masakit sa panit nga mga sirak na kaina
Daw amakan nga ginalolon run.
Nagaompisa run magkalakala ang mga pangka
Amo man ang honi ka mga sirumsirum kag kikik.
Paoli run kami ni Lolo: tana, halin sa pagbakobako obra;
Ako, magaoli sa akun kabataan.
 
Maoli run kami.
 
Kadya nga gabii
Makita ko ang mga sarakyan
Nga nagasakay ka doro nga mga pasahiro
Samtang ginatoltol ang EDSA, C-5 asta Rosario sa Pasig paoli sa balay.
Ang mga sarakyan mga pangka nga ginagoyod sa andang kahig
Ang andang mga mata nagasadlab nga
Nagaturuk kanakun.
Ang byahi nagaigud, tam-an ka bohay, sobra pa sa nagakompanyar sa patay
Ang kagab-ihun banig nga ginhumlad run.
Ang kagab-ihun kapay nga nagapandong sa tanan.
Ang kagab-ihun si Lolo
Nga nagaimaw kanakun.
 
Makaoli gid ako.
​

Indi ko mahambal
Ang kasadya ko
Kahapon

Kang nakita ta ikaw.
Di bala talagsa pa sa malaka kon kita magkitaay?
Kon, magkitaay gid man.

Dyan ikaw sa kilid
Wara ti limug
Gahulat nga sapakun
Ilahas ikaw nga nagtalang sa syodad.

Sa doag mo nga birdi, priska
Sa tunga ka daw maguba nga syodad:
Mayab-on kag madulum.
Ang pintora sa bilding nagakakas run.
Sa pagtingub ka lopa kag pingas ka siminto, ikaw nagtobo.

Nagatingala gid ako
Kon paano kaw dya nakaagto:
Ginhuyup ayhan ka hangin?
Okon, ginlopad ka mga pispis?
Nagadohadoha ako
Ikaw gid man ra?

Manogbolong ko,
Lantawa ang mga pilas ko –
Mga pilas kang kaloya kag kasubu
Mabolong mo pa ayhan dya?
Kon mahimo pug-a ang imong lawas
Agud mag-agay ang imong dogo
Agud mabolong dyang lawas kang kahidlaw

Agud mangin isara – ikaw, ako – kita sa banwang hamili.