Baso
ni Maria Milagros C. Geremia-Lachica
Nagahulat sanda kay Nida nga nagapangulintas ka rosarito. Ginsindihan na ang kandila, nagluhod kag nanguros. Nagsunod ang tanan.
“Sa ngaran kang Amay, kang Anak, kag kang Ispiritu Santo. Amen.”
Ginkaptan ni Nida ang kandila kag gintagub ang nagakulub nga baso sa siga. Ginpakulub na dayon ang baso sa ibabaw kang kartolina nga nahumlad sa salug. Ang darwa na ka tudlo sa natuo nga alima nagapatong sa buli ka baso.
“Spirit of the glass, are you in?”
Ang mga bag-ohanun nga mga taga-pihak kwarto nakunyag nga daw kinulbaan. Nagasugid ang mga imaw ni Nida nga pirmi sanda nagasipal spirit of the glass. Paayaw pulaw sanda kadya hay Sabado sa rum-an.
Nagadukdukanay sanda sa paglumpagi sa salug palibot sa kartolina nga may nakasulat sa ibabaw nga mga letra kang alpabeto kag mga numiro uno hasta dyes. Sa idalum nga bahin may darwa ka timbulog nga may nakasulat “Yes” kag “No.” Sa tunga ka kartolina may timbulog pa gid kag may nagakulub nga kristal nga baso. Amo dya ang balay kang baso.
“Ay, ti, wara paghulag haw? Basi bungul, pamangkuta liwan,” dikta ka taga-pihak kwarto. Ginpatong liwan ni Nida ang darwa na ka tudlo sa baso.
“Spirit of the glass, are you in?
Naghulag ang baso, nag-agto sa timbulog nga “Yes” kag nagbalik liwan sa balay na. Daw indi magpati ang mga bag-o lang kakita.
“Ginatulod basi ra ni Nida .…”
“Ason, kon malyag kaw, ibutang man tudlo mo imaw kanakun agud maman-an mo nga wara ti nagatulod,” paathag ni Nida.
Ginakarat si Pinang. “Maan, durupi hay gahulat ang ispiritu. Pamangkuta kon sin-o. Basi si Andres Bonifacio. Kasan-o to si Jose Rizal nadakpan namun.” Naghinarakhak sanda.
“Ay, tuod tana ra akun. Bisan usisasun pa ang listahan ko. Ako kabay sekretarya kada sipal.” Dayon bayaw ni Pinang kang gamay nga notbuk.
Pagpamangkot ni Nida kon ano ngaran ka ispiritu, ang baso madasig nga nag-agto sa mga letra.
Nagbuslo baba ni Ason kag nagbahul anang mga mata. Daw indi kapati pero nagahulag lang tuod ka ana ang baso. A-N-T-H-O-N-Y.
“Anthony, pira idad mo?”
Nag-agto ang baso sa numiro 2 kag 0.
“Tingala ko man nga pagsik hay. Dumduman ko kato, may nagsulud nga ispiritu nga otsentahun run. Abaw, nagaigod ang baso. Pamangkuta kon tagadiin.”
Pagpamangkot, dasig liwan ang hulag ka baso. D-E-L-G-A-D-O-S-T.
“Taga-rugya sa atun kalye! Hala, basi katurog ria kag nadakpan ta ispiritu na.”
“Ay, wara pa katapos ka sabat. Ano kuno?”
“N-E-X-T .…” Tanan sanda nagabasa ka mga letra nga gina-agtunan ka baso. Saku man sulat ni Pinang. “T-O-Y-O-U-R-B-O-R-D-H-O-U-S-E.”
Mga tatlo ka segundos nga hipus kag nagkinagual sanda. Ang kandila sa kilid ni Nida napatay kag nanimaho. Maabtik na nga ginbaliskad ang baso kag may nagpasiga ka sulo. Wara run sanda magpadayon. Mga alas onse pa lang raad.
Pagkaaga, nanguyus sanda tanan sa panggurahab ni Ason kang balita halin sa tyangge. Ang bag-o nagsaylo nga hinablus kang tagapihak-balay nasal-an, ginbuno kahapon. Nabugtuan ka ginhawa sa Mission Hospital mga alas dyes kabii. Anthony ngaran na.
- Katapusan -