Tatay
ni Linda C. Arnaez-Lee
Adlaw kang mga tatay kadya. Adlaw kang pagpasalamat sa ginakilala nga harigi kang panimalay. Masaku ang pamilya ni Jinsu. Magwa sanda para magkaun sa restawran sa syudad kang Los Angeles. Nakailis run sanda tanan, ginahulat lamang si David halin sa kampo.
Onse anyos si Jinsu Lee. Ang tatay na sangka Koreano kag ang nanay sangka Pilipina, si Michelle. Sangka tuig pa lang sanda rugya nagaistar sa Los Angeles, amo man ka lawid kang ginkasal ang nanay na kay David Williams, ang tatay ni Nene Sheila nga ana libayun.
Indi na maintyindihan ang nagkaratabo. Ang nadumduman na katong darwa ka tuig ang nagligad, nag-away si tatay kag nanay na, kang ginpamangkot na ang anang nanay parti sa anang libayun. Bag-o lang sanda nakabalik halin sa bakasyon sa Pilipinas. Natingala tana kon andut ginbilin si Nene Sheila sa Pilipinas kag sanda lang nga darwa ang nagbalik sa Korea. Nadumduman na ang pagbudlo kang mga mata ni nanay na kag ang pagpanginwara nga wara kuno ti Nene Sheila nga libayun tana. Nadumduman na man ang pagpin-ut ka dughan ni tatay na nga ginbangdan kang gulpi nga kamatayun.
Sa manghod nga pinsar, indi matahi ni Jinsu ang mga nagakaratabo sa anang kabuhi. Pat-ud na nga libayon na si Nene Sheila. Nakita na ang pag-atipan ni nanay na kang sa Pilipinas sanda. Pero andut ginpanginwara na dya?
Pagkatapos kang lubung, nangin klaro kana ang tanan kang nag-uli sanda sa Pilipinas, kag nagpakasal si nanay na sa tatay ni Nene Sheila, sangka itum nga Kano. Ginhitso ang andang mga papeles, lakip ang pag-adap kana.
Sangka US Army si David nga nadestino sa Seoul kang magkilalahay sanda ni Michelle sa sangka Pinoy restawran nga ana ginaobrahan. Nagluyagay sanda, kag sa pira ka gabii nga pagtabuay nanda sa sangka hotel, nahuman si Nene Sheila. Likum kay Daewoo nga ana bana, rugto sa Pilipinas ginbata si Nene Sheila. Ang rason ni Michelle sa malawig nga pagtinir amo ang pag-atipan sa nagamasakit na nga tatay.
Tulad, tatlo run ka tuig si Nene Sheila kag nagabahul dya nga kaanggid ang itsura ni nanay na pero ang panit sa tatay nagsunod. Si Jinsu, maputi kag pirot ang mga mata, gani wara ti may nagduha-duha nga si Daewoo ang tatay.
Nagsulud si Jinsu sa kwarto para mamangkot kon ano oras sanda mahalin. Naabutan na nga nagaistorya si nanay na sa Skype.
“Indi kaw magkabalaka. Mas mayad ang amun sitwasyon rugya kaysa sa Korea. Kag palangga na man ang imo bata.”
Amo dya ang nabatian nga mga tinaga ni Jinsu kay Michelle. Nagbalikid si Michelle kang mabatyagan ang pagsulud ni Jinsu.
“Oh, Jinsu, si Tito Raul mo,” ang hambal ni Michelle nga ginatumud amo ang kaistorya sa skrin.
Wara ka hulag si Jinsu sa ana ginatindugan. Ang ana nakita, sangka pamilyar nga itsura, pirot nga mga mata kag maputi nga pamanit pareho kana. Daw pinihak sanda nga bunga.
“Tatay … Raul .…”
Wara mapunggan ang pagturo kang luha sa mga nagapamangkot nga mga mata ni Jinsu.
- Katapusan -