Mga Itip kag Kinagot ka Pista: Sangka Rebyu
ni Stephen Louie R. Checa
Ikarwa nga Bahin
Sa pihak nga bahin, sangka namit pa gid nga putahi ang ginbitbit ni Arnaez-Lee paagto kanakun. Rayu pa lang gusto ko run galwun ang anang istorya nga “Panaguay.” Kang gamay ko, magluwas sa balay-balay kag badilanay kang pusil-pusil nga human sa paklang ka saging, amo gid dya ang sara sa mga paborito ko nga sipal. Kapira takun makalapak ka iti gani kadya sa sobra ka panago sa mga likod ka pugadan kag dalum-balay. Garing imbis nga magkadlaw ako, daw mas naluyahan pa ako maminsar nga sa tulad, daw wara run ti mga bata nga nagasipal kang panaguay, kondi mga daraga kag soltiro run ang nagapanaguay, kag ang iban, mga bana nga nagapanago sa andang mga asawa. Kis-a ang masubu pa kon magharabok busong nanda. Ginpabusong kuno ka tamawo ukon kama-kama. Ay, maan lang kay Malu.
Gamayan lang ako madunlan pagkita ko kang sangka putahi nga ginraha ni Arnaez-Lee nga “Ang Daraw.” Ay, abaw, nagkadlaw takun sa indi oras piro -nagpundo ako, nag-inum ka tubig kag naminsar. Duro pa gid man kanatun ang ipokrito. Nga bisan anhun ta ka pangamuyo, nagapangibabaw sa gihapon ang atun mga kahadluk kag kalibutanun nga mga paminsarun. Ang iban kanatun matuod nga may sarig sa Diyos piro daw mas bahul pa ang pagpati sa maranhig.
Bangud nga bulan kang Hulyo, gulpi nagbunuk ang uran kag nagpangilat. Gulpi man nagdinagusu sa sulud ang mga imaw ko nga nagapamista. Piro ang iban nga gutum gid wara sa kilag nanda. Piro nagpundo gid takun ka usang kang nasagamsaman ko ang kaaslum kang pagtimalus sa istorya ni Emmy L. Masola sa “Kilat.” Abaw, daw naigo man ka kilat ang akun tagipusuon sa ginhambal ni Marcial kay Caridad, piro kang natapos ko basa ang anang istorya nadumduman ko si Ginuong Hesukristo kag ang anang mga tinaga, “Himua sa imong isigkatawo ang luyag mo himuon kang isigkatawo mo kanimo.” Piro wara tana nagkuon nga magtimalusay kita kondi magpalangganay nga wara nagahulat kang balus.
Gulpi lang takun nangita ka ginat-an nga tambo nga may langkay nga bagungon pagbasa ko ka istorya ni Masola nga “Ang Usa kag ang Tibo-tibo.” Sangka istorya dya nga daw pambata piro angay man sa mga mal-am nga hambog kag hilig magpakanaba kang andang isigkatawo. Andam kamo basi sangka tibo-tibo lang ang makapapukros kang inyong ginhawa.
Nayugit ako kang sabor ka istorya ni Danny S. Tabuyan. Sampat gid sa pagpamunsyon ang istorya piro masubu pinsarun ang nadangtan ni Itang sa anang istorya nga “Ang kasal ni Itang.” Ang dya nga istorya sangka maaslum nga kamatuoran sa diin duro gihapon sa tulad ang mga ginikanan nga daw saging lang nga ginabaylo sa sangka bol nga tuba ang andang bata kag bisan nga hilaw pa pirit nga ginakalburo. Ti, ngir-o man ang bata nga ginapirit. Ang istorya ni Tabuyan nagatudlo kanatun nga ang gugma indi pwede mapirit bisan pa kapira kaw magpapunsyon.
Manamit kag kid-ul ang saging nga gin-amoma ni Tabuyan sa anang mga bisita sa “Harana.” Ambay kon uso pa ria kadya nga tyimpo sa tunga kang silpon kag pisbok. Kag ang kabudlay kang soltiro nga nagapamasyar sa naluyagan na nga daraga nasaburan ko gid sa dyang istorya. Hamak timo kara, agwantahun mo mamasyar sa kagab-ihun, magkanta bisan libagun kag manukduk imaw sa imong mga karibal asta nga magkarahulog kamo sa nagrugho nga balkon. Piro kon sabagay ang gugma kang matahum kag mabuut nga daraga labaw pa sa tam-is kag kid-ul nga saging.
- Sundi ang kasugpon -