Regalo
ni Ritchie D. Pagunsan
Bisan nagabatyag kang pagkangilin nga ginbaligya na ang gitara, nagayuhum si Ramon sa ginabitbit nga regalo para sa asawa. Pat-ud na nga malipay si Elena sa ikapulo nga pagsukat kang andang kasal.
Puraut ang pangabuhi sa bukid. Ginakini ang tanan. Naman-an ni Ramon nga nabudlayan ang asawa magpasigo kang maniki na nga kinitaan sa pag-agsa ka taramnan kang anang tiyo. Amo dya ang kabangdanan nga sa sulud kang syam ka tuig nga pag-asawahay nanda, wara tana ti regalo nga natao kay Elena. Piro bukut likum kay Ramon nga may sangka butang nga ginaimahan ang asawa bisan wara dya nagasugid kana.
Gani kadya nga tuig naghimakas gid si Ramon nga itao ang ginahandum kang asawa. Gusto na ipabatyag ang anang pagpalangga hay nangin malipayun tana sa tinuig nga imaw si Elena. Bisan wara sanda ginbugayan ka bata, maduro ang pagtakus nga imaw nanda nalampuwasan.
Turog pa si Elena kang maghalin tana kaina kang kasanagun. Tapuson na kuno ka timprano ang ginaobra nga kahon sa uma. Piro sa tuod lang, indi na malyag makita tana ni Elena nga dara na ang gitara nga ibaligya. Mangusisa pa dya.
Soltiro pa tana kang ginsubli na ang gitara nga dya kay tatay na. Tungud daan run, nabugto kadya ang sangka kwirdas na kang sarang-tuig. Wara dya dayon maislan hay sa Manila pa baraklun ang irilis gani may kamahalun.
Naghamtung si Ramon nga imaw ang gitara. Amo man dya ang ginkuting-kuting na kang gabii nga nangharana kay Elena. Nangin saksi dya sa malipayun na nga pagpangasawa. Para kay Ramon, kabahin ang dyang gitara kang anang kabuhi. Gani mabug-at ang buut na kang ginabaligya dya kaina sa banwa agud mabakal ang ginaali-ali na nga regalo para sa asawa.
Buhay run panilag ni Ramon nga nagalanat ang mata ni Elena sa istanti kang alahas sa banwa. Kada dulhog nanda kon adlaw kang tyinda sa Bugasong, indi mahimo nga indi maghapit si Elena sa baraka agud maglantaw kadya. Natuipan na dya sangka bis kang naglisensya si Elena nga may bidlun, piro kang buhay magbalik, ginsundan na dya agud abatun. Rugto na nakita ang kakunyag kang asawa sa bulawanun nga sukbit. Anyuan gid sa kulintas ni Elena nga tugro kang tiya na sa anang pagdibo. Kalabanan sa nakakita nagadayaw sa katahum kang kulintas.
Sirum run kang mag-abot sa andang balay si Ramon. Ginakarat dya nga ipakita ang dara sa asawa. Kang matapos ang yapon, lagilagi nga ginhumlad ni Ramon ang alima nga kaina pa nakuum. Sa anang palad natungtong ang nagainggat nga sukbit sa kulintas.
Nahangyus si Elena, nagayapa-yapa nga gindawhat ang buhay run ginahandum. Piro hinali mahinay dya nga nagnguynguy, buta kang hibubun-ut. Gin-ako na nga wara run ang kulintas. Ginbaligya na ka sarang-bulan agud ibakal kang regalo para sa anang pinalangga nga bana.
Malawig ang kalinung nga naglabay. Ginbusikad ni Ramon ang naputos sa papel nga gindawo kana ni Elena. Daw ginkudot ang anang dughan. Hinali may nagbukad nga luha sa anang mata kang nakita ang regalo.
Kwirdas kang gitara.
- Katapusan -