Huram
ni Emmy L. Masola
Indi matapos ang adlaw nga wara na ginakuhap ang akun likod para maumpawan ang nabug-atan ko nga tagipusuon dara kang kamingaw nga nagsurup run sa akun kalawasan.
Duro ang obra sa opisina kag kapoy gid ako pirmi. Mayad lang raad ang tanan kon sa pag-abot ko sa balay nakahanda run ang pagkaun, ugaring maabat pa ako ka akun bata nga ginabilin ko sa tupad balay para may imaw kag pag-abot namun sa balay, kag maraha pa ako ka rayapunon.
“Uli ta run, Macoy,” singgit ko sa bintana ka amun ingud-balay. Amo ra adlaw-adlaw ang ginahimo ko kag dayon man dalagan ka bata pagwa.
“Ano ra, Tay, dara mo?” pamangkot ni Macoy kang nakita ang pinutos nga pansit sa akun alima.
“Ah, rayapunon ta dya hay kapoy run ako magraha,” sabat ko.
Ginbuksan ko ang gawang. Sa liwan, nagabarakang sa akun panurukan ang akun sawa nga nagapungko sa tumba-tumba, nagaturuk sa sagwa ka bintana kag daw may ginaistorya.
“Macoy, tawga run si Nanay mo, mayapon kita,” sugo ko.
Dasig nga gindapit ni Macoy si nanay na kag ginbutung paagto sa komidor. Lima run ka tuig nga amo dya ang kahimtangan ni Nancy.
Mapagsik kag maabtik nga babayi kang nakilala ko. Dasig nga nahulog ang buut ko kana bangud napaayad na ang sakit nga akun nabatyagan kang pirit ako ginpabulag ka akun mga ginikanan sa babayi nga ginpalangga ko halin kang natubuan ako ka buut. Sa bugu nga istorya, bangud kay Nancy, nalipatan ko ang sakit kag pagkatapos kang lima ka bulan nga pagnobyohanay, nagpakasal kami. Wara ko man mabatyagan ang kalipay kag pagpalangga nga pariho sa akun nobya kauna piro kuntinto run ako sa amun pag-asawahay ni Nancy hasta nga ginbugayan kami ka bata nga lalaki.
Kang nagbahul si Macoy, nagbalik si Nancy sa pagkamaistra. Masadya ang amun pamilya bisan simpli lang ang amun pangabuhi. Piro sangka adlaw, nakabaton ka masubu nga balita si Nancy.
“To, napatay si Manding Soling,” nagahiribiun nga sugid ni Nancy pag-abot ko sa balay.
Rugto nag-umpisa ang tanan. Ginnirbyos si Nancy bangud wara run tana ti masandigan nga mal-am. Si Manding Soling gid lang ang nakilala na nga ginikanan bangud napatay kuno ang ana mga tuod-tuod nga ginikanan sa sangka trahidya, istorya nga gusto ni Nancy patihan piro sa anang tagipusuon, naman-an na nga tana ginpatumbayaan ka anang mga ginikanan. Ginbatyag ni Nancy ang pagkamatay ka anang tiya hasta nga naapiktuhan ang ana pagturog, pagkaun, kag bisan pagtudlo. Nag-untat tana sa pagmaistra kag sa adlaw-adlaw nga tanan, nagaturuk run gid lang sa bintana kag may ginaistorya. Kon inogturog, mabatang sa katri kag diritso turog. Pagbugtaw sa aga, bangon kag magpungko liwat sa tumba-tumba.
Amo nga sangka adlaw, kang daw indi ko run maagwanta ang kabug-at kang akun dughan, nakabuya ako ka sagunson nga pisngu sa akun opisina kag nagdalidali dalagan si Clarita, ang akun sikritarya, nga may bitbit nga baso ka tubig. Rugto nag-umpisa ang tanan hasta nga naandan ko run ang ana pag-atipan kag pagpalangga.
Huram, piro yadi pa.
- Katapusan -