Rapit Gid Lang Ako Mauli
ni Elsed S. Togonon
Ginabarukuy ka ubo si Mike kang nagapila agud magbakal ka tiket sa LRT. Ginatakpan na kang panyo ang anang baba piro indi na run gid mapunggan. Bisan ang mga tawo nagatinuruk kana hay dasig ang pagsaka-panaog kang anang abaga dungan kang anang hapo. Mahinay ang hulag kang linya nga haros kadangat run sa hagdanan kang LRT North Avenue Station. Amo dya ang kalabanan nga masugata kon nagadinagusu ang mga tawo kon tag-uruli sa hapon. Amo dya ang adlaw-adlaw nga ginaatubang ni Mike kon mag-uli tana sa Las Piñas halin sa anang obra bilang editorial assistant kang sangka balay-balhagan (publishing house) sa Quezon City. Kag tulad, mas nabudlayan tana tungud sa anang ubo nga sobra sangka simana na run ginaantos.
Kang nagasakay run sa tren paagto sa Vito Cruz, ginpanilagan ni Mike ang mga bituon sa langit kag ang ugsad sa gwa. Sa salaming nga bintana kang tren, hilmunun man ang anang kapoy nga aninaw. Nagginhawa tana kang madalum kag ginpirung ang anang mga mata. Sa anang pagdahumdahum, liwat na nga nabatian ang balud sa baybayun kang Casay kag ang pagsinggitan kang mga manogpanahid nga nagabutung kang lambat agud makaayap kang pirambilog nga dawi kang mga manogpanagat. Namuragmuragan si Mike sa pag-uyug kang anang silpon. Nakabaton tana kang minsahi halin sa anang nanay. “To, san-o ikaw mauli?” Ginbasa na lang dya kag wara ginbalusan. Liwat tana nga nag-ubo kag gintabunan na kang panyo ang anang baba. Nakabatyag tana kang ramig nga nagpakudug sa anang kalawasan.
Tungud sa trapik, mga alas onsi run nakaabot sa balay si Mike. Nagparamuypuy tana kang gin-abrihan na ang gawang. Sa anang pagsulud, pira pa lang ka lak-ang, gulpi lang nga daw may nagtiklod kana kag hinali tana nga natumba. Wara na pa nabuksan ang sulo amo nga sa tunga kang dulum, pakamang na nga ginsagap ang anang nebulizer. Amat-amat tana nga nagpungha. Sa paghaklu na kang bulong, nagsuput tana kang kapagrus agud magtindug kag pasigahun ang sulo. Daw naghaganhagan ang anang hapo. Nagpungko tana sa salug kag gin-abrihan ang bag. Ginpagwa na ang sobri kag ginbuul ang sangka sulat. Mahipus na dya nga ginbasa kag nag-ulungulung. Ginbalik na ang sulat sa sobri kag maluya nga nagsulud sa anang kwarto. Wara run tana kailis hay ginkunupan tana kang tuman nga katuyo. Piro bisan daw mapirung run ang anang mata, gintublag mangud tana kang natabo sa kadya nga adlaw. Sa anang painoino mabatian na ang pamuyayaw kang anang amo. Gintinguhaan na pamatian ang ambahanun kang balud ugaring mga tarum kang tinaga ang anang mabatian.
“You’re fired.”
Ginlantaw na ang kisami kag liwat nga nagdahumdahum kang mga bituon kag ugsad. Liwat tana nga nagginhawa kang madalum. Buhay na nga ginpangita sa anang paminsarun ang mga kurbada kang karsada kag mga rabong nga kakahuyan sa anang pinalangga nga banwa. Sa darwa na ka tuig nga pagtinir sa Manila, liwat na dya nga ginkalangkagan nga makita.
Ginbuul ni Mike ang silpon kang nagbalus sa anang nanay.
“Ma, rapit gid lang ako mauli.”
- Katapusan -