Tungud sa Bulag
ni Consolita V. Rubino
Kauna nga panahon may sangka mag-asawa nga nagauli sa sangka balay sa binit kang karsada. Mataas ang andang balay kag wara ti siklat sa idalum. Ang dya nga mag-asawa baw-as, gani nga wara sanda ti bata. Sanglit ka ria nga darwahanun lang sanda, wara sanda ti ginapanimbangan nga ibang tawo ukon mga kabataan. Kag tungud nga wara man sanda ti ginasakuan, masami sanda nga nagaaway, kag sa andang pag-inaway pirmi sanda nagasinggitanay.
Sangka adlaw nagbaga sanda ka todotodo kag nag-abot sa punto nga naghangkatanay run nga bugtuon ang andang rilasyon bilang mag-asawa.
Mabaskug ang uran kato nga adlaw kang may dara pa nga mabaskug man nga daguub. Gulpyada ang pagbunuk kang madamul nga uran, gani nagdaralagan ang mga tawo nga nagapanaw sa karsada agud magpasirong. Sanglit ka ria nga ang andang balay marapit sa karsada kag wara ti siklat, may nagpasirong nga bulag sa idalum ka andang balay agud to nga indi mabasa.
Samtang nga nagapasirong ang bulag, padayon gihapon ang pwirti gid nga pagbag-anay ka mag-asawa. Hesus, Marya, kag Husip! Ay, sus, nabatian kang bulag ang sininggitanay nanda nga darwa.
“Bulag i kon bulag! Anhaw, abi mo indi ako kasarang?” ang hambal ka asawa sa anang bana nga nagaugut. “Tabi ko lang, basi ikaw ang indi ka isrot mangabuhi hay indi ikaw kamaan magraha.”
Hinali nga naghuraw ang uran kag maasnahan run ang hambal ka darwa.
“Sigi, bulag ta kon bulag! Insigida, kon amo ria ang gusto mo!” ang sabat man kang bana sa anang asawa nga nagasinggitan. “Abi mo nahadluk ako nga magutman?”
Ay, sus, tapos ta, ang bulag sa idalum ka balay nagsinggitan man kag mas tunog pa ang anang limug sa mag-asawa. Batiun ang anang singgit asta sa pihak nga balay.
“Hipus kamo dyan! Anhaw kon bulag, indi makapasirong? Gali hay bulag ako, insultuhan nyo ko,” ang kumod kang bulag nga sa anang pinsar tana ang ginapabatibatian kang mag-asawa sa ibabaw.
Nabatian ka mag-asawa ang singgit ka bulag. Hinupuyan sanda nga darwa kag dayon nanda hanihani nga nagakuon, “May nagapamati gali kanatun.” Kag rugto nanda nasapwan nga may bulag gali nga nagapasirong sa idalum ka andang balay.
Daw sinabyahan ka tubig nga hinali nagtahaw ang kaugut nga nagabalingaso sa dughan kang mag-asawa. Naghipus sanda nga darwa kag nagkalma ang andang mga baratyagun samtang nagapanilag sa sunod nga hambalun kang bulag sa idalum kang balay. Tungud nga naghuraw run ang uran, amat-amat man nga nagpadayon ang bulan sa anang paranawun. Nabilin ang mag-asawa nga nagaturukay.
“Kinahanglan lang gali natun ang bulag para indi kita magbulaganay,” ang hambal kang bana sa asawa.
“Huud, mayad man nga may nakapadumdum kanatun,” ang sabat ka asawa sa bana.
Naghaksanay ang mag-asawa kag dayon nanda darwa uruk-uk ka kadlaw.
Tungud lang sa bulag, nabugkus ka mahugut ang mga baratyagun ka mag-asawa kag ang pagtingbanay nanda nangin masulhay hay wara run ti sagi ka inaway. Hay kon mag-umpisa gani ang ugut kang isara, ginapadumdum kang isara ang bulag nga nagpasirong sa idalum kang andang balay.
- Katapusan -