Paramangkutanun ni Lolo Tiking kay Lola Kinya
ni Stephen Louie R. Checa
Sa diin run ang anay adlaw nga bulawanun
kag ang langit nga asul nga ang duag nagailwak sa dagat kon adlawun
kag nagaduag-rosa pagsamput kang kasisidmun,
ang kaanyag kang dyang hardin nga nangin paraiso kang kapispisan
kag kang mga buyog kag alibangbang, nangin baylihan
nga imaw ko magsipal, saot, kanta, tumbo kag magdalagan,
ang kabugnaw kang nagailig nga tubig ka mga kalog kag kasubaan
nga ang ragasras daw karantahun nga koro kang mga anghel sa kalangitan
kag kang mga kapoy nga mga utok kag lawas, pinakanami parigusan?
Ayhan may sabat pa ako nga masapwan sa dyang kalapadan
nga sa tulad nangin mga kongkrito run nga tore ang mga kakahuyan,
ang tubig sa plastik nga surudlan, ang mga prutas sa mga lata run lang matirawan?
Ayhan, antis ako magpamaalam sa dyang kalibutan
mabatyagan ko pa ang pagtupa kang uran sa akun dughan
kag maagum kang atun mga kaapuhan ang gugma kag kalipay nga atun ginsaruhan?