Serbidura
ni Linda C. Arnaez-Lee
Gagataw ang barikos kag ugat sa batiis
Sa sobra nga tindug panghugas ka pinggan
Kon san-o matapos, indi mapaktan.
Gintawag ang imo ngaran
Kang amo mo nga buntudan
Ang kostumer sa teybul wan
Kang pagkaun imo nga hatdan.
Taw-i man dayon
Kang beer kag bihon
Ang kostumer sa teybul to
Gapamaypay kanimo.
Ay dali! Sug-alawa!
Ang mga Kano sa karsada
Para indi makadis-ayri
Magyuhum ikaw pirmi.
Iwol-iwol! Liad-liad!
Ipakita imong abilidad
Maanyag bisan may bana
Daraga gyapon ang pakilala.
Pag-uli sa balay gahulat ang magtatay
Gaburu ang busong sigi panghayhay
Wara pa katig-ang hay wara ti bugas
Maiwan bay hay rayu pa ang kinsinas?