Timu
ni Albert Q. Enopiques
Timu lang anay ha
hasta maghagan-hagan
ragukruk kang busung
kag kapin-ut kang dughan.
Sangka litsi lang bay
ang tinig-ang
ni Nanay sa balay
nga nagaparamahulay
hay wara pagpautanga
sa pihak nga baraka.
Si Tatay hipus lang
sa binit nagapaukuy
dayon na panguros
sa tubang ka santos
wara it sulud nga paray
ang ana nga buyus.
Timu lang gid anay
hasta sarum-an
hay amo ang nabugtawan
kag amo ang naandan
kang mga kaapuyan
nga amun nabatian.
Timu lang gid anay
hay nami man ang dapli
lamayo kag ginamus
nga ginlangkay
sa linapwahan nga tagabang
korbasa kag balunggay.
San-o pa ako makatiraw
kang hamal?
agud mabangilan man
ang gahawus nga ginhawa
sa tagiti kang init
ginalatas ko kon mag-iskwila.
Bakas lang sa pagtuon
indi pagpinsara
ang timu sa aga, igma kag yapun
hay sa pira ka adlaw
ang abunansya
kang nagatalimpapaw nga pinggan
imo matirawan.