Ginasagap Ko Ikaw
ni Ma. Aurora Salvacion J. Autajay
Kinulbaan gid ako sa pagsulud ko sa banyo nga nagapalapaga ang kainit sa akun ulo nga daw sa mabulwat, tungud ka indi maintyindihan nga hilanat, kag ugaring ko lang namutikan ang mga pintok-pintok nga pula nga nagarapta sa akun busong. Dayon ko gintawag ang akun bayaw sa pagpangayo ka tabang. Kaimaw ka nagaisaranhun ko nga bugto nga bayi, nag-agto kami sa doktor agud magpakonsulta.
Midyo naba gali ang akun platelet count. Ayhan, dengue run dya? Pagkagat kang kasisidmun, gindara ako ka akun libayun sa hospital. Nagasala ako kon ano run akun balatian, hay daw ginahapo ako, sabagay nga gintakdan ako ka oxygen, kag ginpaagi ako sa x-ray. Basi kuno may pneumonia ako, kuon ni Dok.
Naminsar ako nga wara run ako ti paglaum sa kabuhi. Paano ang akun pinalangga nga mga hinablus? Paano ang akun buruhatun nga libro ka mga binalaybay? Paano ang akun obra sa kapitolyo? Paano ang simbahan nga akun ginabuligan, paagi sa pagbasa kag pagkanta? Apat run man ka dikada kag walo ka tuig ang nadangat ka akun idad, piro para kanakun, bata pa ako sa gihapon para madura sa dyang kalibutan.
Naghulat ako sa emergency room ka order halin kay Dok, samtang ginahikot pa ka akun libayun ang kwarto nga akun pagasudlan. Gusto ko magpangamuyo, piro sa kakulba, indi ko mahimo. Blangko ang akun paminsarun, tuman ka rayu ang naapukan nga daw tinakaw ang akun dungan paagto sa lugar ka mga ingkanto kag mga tamawo. Ayhan, may nag-orasyon kanakun agud magmasakit ako. Ayhan, may nagsumpa kanakun, tuga kang kasabit kag kahikaw kontra kanakun, sa sulud ka andang kadu nga tagipusuon? Andut indi mapiho ka mga doktor kon ano ang akun ginabatyag?
Nagpaabot-abot ako nga isugidan run ako nga ang akun balatian, indi run matabangan. Gulpi lang ako nahidlaw kang kasakuun kag kagahud kang kalibutan sa sagwa ka hospital, wara sapayan ka akun pagkakapoy. Bisan ano pa ria tana ka galung kag nagasurumbali, basta sa idalum lang ako ka sirong kang kainit ka adlaw, kabuhi man ria gihapon sa akun pagkamaan.
Ang mga nagadaligdig nga mga sarakyan sa mga karsadahun, sa akun paglaktud kag paglubas, nangin sinyal tanan kanakun kang kabuhi, parihas kang pagpanalaytay ka dugo sa akun mga kaugatan nga nagatao kanakun kang kabuhi.
Sa akun mahipus nga pagpalibug, pwirti gid ka rayu ang ginparangdangatan ka akun paminsaran. Mas rayu pa sa Manila sa libayun ko nga laki, hay daw sa Amirika gid nagaparanglakaak, kay Nanay kag sa isara ko pa gid ka libayun nga laki nga nagasakay. Wara gawa tana maglagaw akun paminsaran kay Tatay kag sa amun kalibaynan nga bugto, hay rapit lang tana sanda gawa kanakun. Gusto ako magturog agud makapahuway, ugaring nahadlukan ako nga basi indi run ako makabugtaw sa masunod nga adlaw.
Nagsulud ang darwa ka mga anghil kag ang isara kananda, mataas, maputi, pirot ang mga mata, nga daw si San Miguel Arkanghil. Sanda ang mga nars nga nagbataw-bataw kanakun karia nga kagab-ihun.
Sa sobra ko nga kakulba, daw mahibi ako ka sagi pamangkot kay San Miguel, kon ayhan, naman-an na kon ano akun ginabatyag. Ukon ayhan, nga nabatian na sa akun mga doktor kon ano ang kabangdanan ka akun pagbatang. Natingala gid ako kon andut nagaparamula ang akun mga palad, mga butkun, pungyahun kag busong. Dayon na ako ginpasarig nga ginahimo man nanda ang tanan para ako mag-ayad. Ginpirit ko dayon tana nga pangayuan ka sangka pabor. Ang pabor ka anang pagpangamuyo para sa akun pag-ayad, hay nagapati gid ako nga makabulig gid tana kanakun, hay sin-o pa abi ako magasarig kag mangayo ka bulig hay marayu man run ang mga kilala ko nga iba, hay wara gani sanda makamaan nga rugyan takun sa hospital. Ginkun-an ko dayon tana, nga kon pwidi lang mahimo, matawas run lamang ako anay kana. Bisan indi ko lang anay makita akun pamilya, basta mag-ayad lang ako anay kag ugaring lang ako mag-uli sa amun, hay ginakinahanglan pa ako ka akun mga kahinablusan. Hay kon wara man lang ako ti paglaum nga magalawid pa, ti, kondi, pulawan ko run lamang ang mga rilibruhon ko nga mga binalaybay, ugaring daw indi ko gihapon matapos ria tanan sa sulud gid lamang ka tatlo ka adlaw, hay masyado pa ka raku ang mga riliwatun. Gani ginakinahanglan ko gid ang mag-ayad. Namati lang tana kanakun, kag wara tana makasabat. Wara man ako magsinuplada kana, ugaring lang nangin apurada, tungud sa kulba kag nirbyos.
Indi ko maintyindihan kon andut nagatawas gid kana ang akun kalag. Ayhan bala, may anggid tana sa nahauna ko nga kahagugma, nga nagpanaw lang sa akun panulnganan, mga katluan run kag tatlo ka tuig ang nagligad?
Kapira na ako ginbistahan kon kamusta run ako, para man sa pagpadumdum ka mga bulong nga akun turumarun. Sa pagpamaan nga rugyan lang tana kon ako may mga kinahanglanun.
Sa akun kahadluk kag kakulba, lagat-lagat lang ang akun panawag kana, parihas abi kang pagpangayo ka doktor nga bistahan anay kon ano run ang dipirinsya sa akun mga mata, ukon utok, hay nagadurobli run ang akun panuruk. Ukon ayhan, nagadurobli kag nagarulubug tana ang akun panuruk tungud sa kakulba hay nagapaminsar ako nga nagaisarahanun run lamang ako rugya sa ibabaw kang kalibutan, tungud gani nga daw karayu lang ka tanan nga daw indi ko run maabot ukon maguraptan.
Kapira man ako magtiraw sa pagpanugid kana, sa pagpaapin-apin, ugaring indi ako makatikab. Daw haros hawidan ko tana, daw mahibi ako, daw indi lang ako gusto nga bayaan na ako. Kon wara lang abi ako ti mga higot, daw mabangon gid ako kag magtawas kana.
Sa mayad nga panwirtihun, nag-ayad gid man ako sa akun balatian sa ikan-um nga adlaw. Makayha gali kag acute bronchitis ang akun ginabatyag. Ugaring, antis pa ang tanan, nagpanginduraan run tana sa akun panulnganan.
Indi ko malipatan ang anang pagkamahinayun nga daw bayi, pagkamabuut, pagkamapinasinsyahun kag pagkamainintyindihun. Nagapabilin gid ang ana nga mga panuruk sa akun tagipusuon, sa adlaw ka pista ka “Nuestra Senora delos Dolores” nga daw mga bituon nga nagakislap-kislap, sa pagpamanagbanag kang kaagahun. Ayhan, sa Ingkantadya lang ako, kon andut raku lang nga mga makataranhaga ako nga nakita. Ukon ayhan, sangka damgo gid lamang dya nga harandurawun. Piro para kanakun, matuod tana nga nagakabuhi rugya sa ibabaw kang kalibutan, kaparihas natun kag bukut sa Ingkantadya, tungud gani nga nadawu ko man kana ang antibiotic nga akun turumarun. Nagluhod pa gani tana sa pagpaandar ka nebulizer hay mapaaso ako kag nagakalimug man tana parihas natun nga tawo.
May gintago-tago ako nga litrato, nga akun ginsagap karia nga kasanagun, nga ginsulatan ko ka akun pagpasalamat kana. Gusto ko itugro kana, piro wara ko man matao. Ayhan, sa kahadluk ko sa akun libayun nga basi karaan na ako? Daw may nagpatunga gid kanamun nga darwa nga nagapamalabag nga indi lang nakun makita. Kon ano man ria, wara man ako ti hinalung-ung.
Pagsulud kang kaimaw na nga anghil man, nga bukut ti taas parihas kana, ginpadara ko run lamang ang akun litrato para kana. Wara ako makamaan kon nakadangat gid man sa natungdan ang tong akun ginpaabot. Sanda lang karia nga darwa ang nakamaan.
Sa pagligad ka mga inadlaw, nagapanumbalik gid si San Miguel Arkanghil sa akun paminsarun kag baratyagun. Sa gihapon, ginasangku gid ako. Wara lang ako ugaring pagpanugid bisan kay sin-o hay ginatago ko lang dya, bilang sangka sikrito. Nagapuling lang sa kahapdi ang akun mga mata sa kahildlaw kana. Ginasagap-sagap ko tana sa mga dalanun, sa mga sarakyan, sa mga nagasirimba, sa mga iskwilahan, piro wara gid ti sinyal ka anang itsura. Makita ko lang raad anang panguyahun kag mga mata nga daw malabituon, nagapati ako nga magaayad run ako sa akun pagkasangku sa tagipusuon.
Tubtub sangka adlaw, daw may naghani lang kanakun: Paano kon tana ayhan si Hesukristo nga nagpakita kanakun mismo bilang sangka nars sa akun pagbatang tungud sa balatian, para lamang magpati ako sa mataas nga gahum ka Ginuo nga labaw sa tanan nga mga orasyon kag sumpa ka tawo sa paghalit kanakun kag sa bug-os ko nga pamilya?
Ayhan, ginpakitaan gid ako ni Hesukristo sa pagkatawo lamang ka sangka nars, agud nga sa akun pag-ayad, manumbalik run ako kang bug-os Kana, paagi sa pagbalik sa simbahan nga akun midyo ginsungunan kag sa pagsarig liwan sa milagroso nga mga pagpangamuyo ka mga kaparian. Ayhan, may misyon pa Tana para kanakun, kon andut gin-ayad Na pa ako. Ayhan, ginatawag na ako sa kombinto para man magsirbisyo sa mga tawo? Ria, ang wara gid ako ti animo.
Hmmm, kon sin-o man gid man ayhan to, si San Miguel Arkanghil ko ngato, padayon ko tana nga sagapun, tungud gid lamang ka raku nga mga kabangdanan nga indi ko man maintyindihan sa sulud ka akun dughan.
Ginapanumdum ko lang nga sa kinabuhi nga dya, may mga tawo nga magalabay sa atun kabuhi, kon kaisa, sangkisra lang, piro tubtub sa katubtuban ang anda ginasala nga handumanan: ang handumanan ka hugut nga pagpangamuyo, para lamang magaayad kag mabuhi pa ako. Gani, samtang may tyimpo pa, wara ko ginapaligad ang kahigayunan nga mapakita man kananda ang akun mayad nga kabubut-un, tungud sa pagpasalamat, sa akun utang nga kabaraslan kananda, kaparihas lang ka akun pag-ayad, tungud lang sa ginpirit ko nga pinangayo nga pagpangamuyo kay San Miguel Arkanghil, ang pagtao bala kanakun ka atun Ginuo ka ikarwa nga kabuhi, paagi kananda nga nagaserbisyo sa ospital.
Abi, pinalangga ko nga San Miguel Arkanghil, kon sa diin man ikaw kadya nga mga inadlaw, pamatii ang pangako ko kanimo nga tubtub nagakabuhi ako, padayon ko gid ikaw nga sagapun.
- Katapusan -