<![CDATA[DUNGUG KINARAY-A INC. - Kon Magpa-Manila ang Karay-a]]>Tue, 07 May 2024 02:35:28 -0400Weebly<![CDATA[Sa RoRo]]>Sat, 28 Feb 2015 00:07:09 GMThttp://dungugkinaray-a.com/kon-magpa-manila-ang-karay-a/saroro
Picture
Himo ni Mary Ellen Golden halin sa http://www.thegoldengallery.com/collections/mother-s-day-gift-ideas/products/dunescape-gicl-e-print


Sa RoRo
ni Michael O. de la Peña


Hay tungud kon magsakay sa
eroplano tam-an kamahal ,
ginhilway ko anay ang akun
damguhanun nga makalupad
imaw ang malum-uk nga mga alapaap.
Wara ako nahadluk magsakay sa RoRo,
Bisan pa daw ginaayag ikaw nga monggo
May gamay nga baratangan tuman ka gutuk
May nagahinibi, may nagaubo, may nagapanukduk
may mabaho nga iti kang bisaya nga manok.
Sa tupad, gahud pa sa motor ka barko nga huraguk
Wara ako makaturog, dyan man gihapon ang kakulba
kag kakunyag sa akun pagpasimpalad.
Kang una sa Ceres kag sa Dimple Star lang ako nagasakay,
Tulad indi mapat-ud kon diin ako dar-un
Kang akun mataas  nga mga handum.

Nagsalta ang kakulba
Nga nagpahaganhagan kang kakunyag
Kang naghuni ang makaburungul nga ugayung
kang Roro nga darwa ka adlaw nga nagpautaw-utaw.
Nagapatimaan dun nga rapit run ako
Sa durungkaan, sa bag-o ngapalibot.
Kon sa diin ako magpasimpalad para mabuhi.
Bukut it mga kahoy kag baras ang akun nakita
Sa durungkaan nga akun raad ginapinsar.
Ginsug-alaw ako ka mga ragkulan nga trak,
Mga magahud nga dalanun,
Mga gadis-uganay nga mga tawo,
Mga gatangkas nga basura
Kag dapya kang hangin nga mabaho,
Kulang sa pagpalangga.
Huud gali, Manila run dya.
Wara dun ako sa Antique.
]]><![CDATA[Mga Pabalon]]>Tue, 27 Jan 2015 21:34:44 GMThttp://dungugkinaray-a.com/kon-magpa-manila-ang-karay-a/mgapabalon
Picture
Himo ni Dalia Geguziene halin sa http://www.rubylane.com/item/715430-dg0257/Peaceful-rural-landscape-scene-watercolor-painting


Mga Pabalon
ni Michael O. de la Peña


Nasira run kang hugut ang karton kang bandi
nga kasoy kag mananam nga mani.
Naputos run man kag nakay-ad ang mga pinanid
kang uga,imaw sa binulad nga lukos nga nagkaging
sa init, sa binit kang baybay kang Anini-y.
Darwa ka sipi nga sab-a,
ang nagpatigdas  ka akun nga malita.
Nagsugod panimahu ang manamit
nga adobo nga baboy ni nanay.
Dya ang akun mangin dapli sa barko.
Nagpaindis-indis ilig ang mga
luha ni nanay sa ana nga uyahun.
Naghugut ang kupkup ni tatay kanakun
Bisan wara run sanda, dara ko sa gihapon
Ang anda pinalangga nga mga pabalon.
]]><![CDATA[Nangasubu ang mga Bulak]]>Wed, 24 Dec 2014 05:50:25 GMThttp://dungugkinaray-a.com/kon-magpa-manila-ang-karay-a/nangasubuangmgabulak
Picture
Himo ni Jim halin sa http://www.jims-watercolor-gallery.com/watercolor-landscapes.html


Nangasubu ang mga Bulak
ni Michael O. de la Peña


Indi  ako makaturog.
Baliswa nga baliswa,
May makaya, mabika
Kakulba nagapanalupsup
sa kusug ko nga mapanaw sa Manila.
Rum-an, bayaan ko dun ang balay
Si nanay, si tatay kag ang
Mga nagapamuyayaw sa kasiringan
Mga kabulakan ko sa hardin nga nagapanaguntun.
Patas kang bata nga nagapangasubu,
Hay bayaan kang anda ginikanan
Nga nagtanum sanda sa lupa.
Nagkipot, nagduko kag naluo
Ang anda matahum nga mga bulak.
Ginhuyup ka maramig nga hangin,
Ang pasaylo, pangako kag pasarig
Nga ako magabalik, magabunyag sa
Anda liwat pagkatapos ko makapanaguntun
Sa malapad nga lupa sa Manila.
]]>