|
Pat-ud ko Rugyan ikaw sa akun tupad Kumkum ang atun mga handum Sa diin hilway kita Lusay sa atun pagpalanggaanay Ang atun kalipay bug-os Kag ang gugma mo nga hilaw Naluto sa matam-is nga paghirupay. Kang nakita ta ikaw Baratyagun ko angay kang baha Indi matapna Mga yuhum mo tubluk sa akun dughan Nga indi ko mahangpan Gintandug mo Ginbagting mo Paghigugma ko nga nagakaturog Imo ginpukaw. Indi ko matungkad ang kalipay Kang kita nagaimaway Dayan sa daray-ahan Alima nagadapitanay Saksi ang balud sa baybay Sa mainit ta nga paghirupay Ang gugma ta nga bulawanun Ginahakus kang maramig nga amihan. Sa atun pagbugtaw Mainit ang pagtamyaw Masinadyahun ang adlaw Kag ako nagaampo sa ibabaw, Nga malab-ot ka akun paglantaw Ang kadalum kang imo baratyagun Sa tunga kang mainit nga paghinugyaw Nga naghatud kang rapuyot nga paumpaw. Ugaring, sa pihak kang akun pagpamat-ud Ginsikway mo ako Sa iban ginbaylo Ang gugma ko nga kauna nagaawas Tulad bubon nga hinali naghubas Sa kasakit nga imo gindulot Luha ko angay sa suba nag-ilig Ang gugma ko nga kanimo ginpasarigan Sa tuman nga kamingaw tulad nagtaliwan. Paalam. Mapanas ikaw sa akun handurawan. |