|
0 Comments
Ang "Pispis nga Adarna" ginlikwat ni Noel G. de Leon halin sa "Ibong Adarna” nga ginsulat ni Virgilio S. Amario nga mas kilala bilang Rio Alma, ang Pambansang Alagad ng Sining sa Panitikan (Adarna House, 1980).
* Litrato: Himo ni buckatone halin sa http://buckatone.deviantart.com/. Kang Napatay ang Sapa |
Ang gabanaag nga katin-aw kang tubig Nga padayon sa pagtubod kag pag-ilig Sa sapa nga nagatugro kang kabuhi Sa mga isda, tanum, kag sapat nga buhi Ang paglinukso kag pagpisik kang mga isda Timaan kang sapa nga bugana Nanarisari nga tanum rugya makita Nga ginaistaran raku nga mga kasapatan Ang pagsaot kang kawayan sa huyup kang hangin Ang paglupad kang mga pispis, paglagsanay kang mga hayup Ang pagtampisaw kang mga kabataan Ang pagkinadlaw nga gadara kang katawhayan Dya tanan nagapakita nga ang sapa buhi Tungud hay nagasagod tinuga nga putli Sangka lugar paraiso nga hamili Kinahanglan pag-ulikid tungud dya lugar nga pinasahi Pero hay ang dyang tanan amat-amat nadura Kang ang tubig nagmara kag ang dyang sapa naguba Ang mga kahoy kag kawayan gintapas kag ginrangga Ang mga kasapatan hinali man nga nadura Nangin malinung ang palibot kang sapa Ang tubig nag-untat run sa pag-ilig Ang mga kahoy kag tanum wara roun magtubo Kag ang mga ilahas nga kasapatan nagparanago. Ang kalinung kang sapa kanakun nagkupu Kasakit dumdumun kang paraiso ka una rugya natago Ginputos kang kalinung kag ginbanigan kang ramo Amo dya ang kamatayun kang sangka sapa nga ang Ginuo nagtugro. |
* Litrato: Himo ni Susan Bell halin sa http://wildlifeartistsofcolorado.blogspot.com/2011/07/susan-bell-artist-bird-oil-paintings.html.
Paano Tatapun ang Nagaulianun
ni Gil S. Montinola
Daw ulianun run ang atun kalibutan. Indi run maintindihan ang ana nga ginapanghimo. Pareho dulang ka dya: kon bulan kang tag-ururan, nagatagiti ang init; kag kon bulan duman kang tag-irinit, nagabundak ang uran, kon kaisa gani gabinagyo pa. Paano dulang kon magnyebe (snow)? Amo pa gid ran ang kurulbaan.
Wara pa isara ka dangaw ang kataasun kang adlaw sa sidlangan, pero tama run ka init ang sirak ka dya. Timprano pa, ginaubos run ka init ang imo pwersa. Manami lang pirmi magpabugnaw sa huyup kang hangin sa idalum ka kahoy, ran kon may bilin pa nga mga maragbong nga puno nga pwede mapasirungan.
Gamay lang nga tinuro ka uran, nagabinaha run. Ano man abi ang manghawid kang tubig-uran kon ang atun kabukidan kalbo pa sa ulo kang mga mal-am? Ang mga ugat daad kang mga daragkul nga kahoy ang mahawid ugaring wara run. Naubos sanda tapas. Gani sa paglum-uk ka lupa, sigurado nga matiphag man ang lupa.
Sa binit duman tana kang baybay, gulpyada lang nga nagalulon ang daragkul nga balud. Nagaugut ka tama nga daw indi na gusto buslan kang mga nagaturubo nga mga panimalay ang mga bakhawan. Ginadalahig pa ang mga baruto kang mga mangingisda nga amo lang ang nagabulig sa anda pangitan-an.
Ang bagyo nagapanguyus run tulad. Indi run basta-basta. Pareho kay Yolanda, seryoso tana sa pagpangguba kag pagpanghawan. Gindara na pa tinlo hasta ang kaluluoy nga mga pumuluyo.
Masunson duman tulad ang linog. Ginatay-ug bala kita para makabugtaw sa mga nagakaratabo do karon? Basi kon padayon lang kita sa pagturog nga nagadaramguhanun?
Balikan ta kang una ang hambal kang mga mal-am: sa mga agi kang karbaw, may isda ikaw nga pwede sabawan. Tulad tana, nagaamat-amat run dura ang mga isda tungud sa mga hilo. Kang una, ginaimnan ang mga bubon. Tulad tana, sin-o ang mainum kon man-an mo nga ang mga hilo nga ginasab-og sa taramnanan kag komersyal nga abono ang nagapanalupsup sa atun tuburan?
Tulad, wara run nagapanghagbas, kondi nagapahapos dulang pauran kang herbicide para magpatay kang mga hilamon sa dalan ukon kahon sa taramnanan. Wara guro sanda kamaan nga indi lang hilamon ang anda ginapatay. Diin run mangitlog ang mga kurit kon wara run it kugon? Diin run maobra balay ang mga damang nga nagapangaun kang mga sapat-sapat nga peste sa taramnanan?
Kon ang atun kamal-aman nga ulianun ginasapupo kag ginabatiti, tion man siguro nga atun balikdun kag sapupuhon ang nagaulianun natun nga kalibutan.
Ano pa gid ang atun mabulig obra sa nagaulianun natun nga kalibutan? Ano pa gid ang inyo napanilagan nga daw indi run nagakaangay nga nagakatabo sa atun palibot?
* LItrato: Halin sa http://southweb.org/lifewise/climate-engineering-and-climate-lies/.
Si Juan |
*Litrato: Himo ni Fernando Botero halin sa https://www.pinterest.com/pin/463096774154404033/.
Pasyente kag Pari |
* Litrato: Himo ni Todd Daniel Grossman halin sa https://sols.asu.edu/sites/default/files/frontiers/2011/images/art/grossman_02_lg.jpg.
Dagyaw Manunulat
Rugya mabasa ang mga sinulatan kang atun dinapit nga mga manunulat.
Sinulatan
August 2021
January 2019
March 2017
February 2017
August 2016
April 2016
November 2015
October 2015
June 2015
February 2014
January 2014
December 2013
Kategoriya
* Litrato: Halin sa http://www.reflectionsofasia.com/.