Mulalung
ni Arlene D. Nietes-Satapornvanit
Kaina pa nabatyagan ni Delia nga daw may nagamulalung kana samtang nagapungko sa kapihan sa banwa. Ugaring daw nahadlukan tana nga maman-an kon sin-o. Andut bala nga ginaturuk tana? May higku bala ang ana pungyahun? May gisi ang ana bayu? Ukon basi nagwapahan lang kana? Nakayuhum man kang gamay si Delia bisan nga daw nakulbaan man gihapon. Daw nag-init ang talinga na kag gusto na run gid turukun kon sin-o ang nagamulalung kana. Kang hana na nga magliso agud magturuk, may sangka tawo nga nagparapit.
“Day, may nagapungko rugya?” pamangkot kang tawo nga ginatudo ang purungkuan nga bakanti sa atubang ni Delia.
“Kita mo run gid nga bakanti ang purungku-an …, “ sabat ni Delia nga daw may pagkasuplada. Ginturuk na ang itsura kang tawo kag napinsar na nga daw kilala na ang tawo nga dya.
“Pwidi ako ka pungko rugya?” pamangkot liwat kang tawo.
“Wara man ti may nagapugung kanimo magpungko rugyan,” sabat pa gid ni Delia. Sa pinsar na, andut nga daw nagaugut gid tana sa sagi ka pamangkot kang tawo nga dya. Nalipatan na run lang ang pamatyag na nga may nagamulalung kana kaina, kag daw nadura run man ang baratyagun nga to. Basi nagpanaw run kon sin-o man to nga nagamulalung kana.
“Day, kaina pa ako nagamulalung kanimo,” kuon kang laki.
“Ha?” gulpi nga sabat ni Delia, kag sa ana nga pinsar, “Ay tana gali ang nagamulalung kanakun.”
“Andut haw?” pamangkot ni Delia nga nagakabalaka kon ano ang rason kang tawo nga nagasagituruk kana.
“Daw kilala ta ikaw mong. Buhay ako nga wara kabisita rugya,” paathag kang tawo kag magyuhum.
Ginturuk ka mayad ni Delia ang tawo kag daw namay-uman na nga daw kilala na man ang tawo, kag daw parihas man ang anda nga idad. “Hmmm, may hitsura man ugaring daw ka prisko,” hunahuna ni Delia. Amat-amat nga nadura ang ana nga kahadluk kag daw nahilwayan ang ana nga pamatyag.
“Ay, gali? Sa diiin kaw nag-iskwila rugya? Ano nga mga tuig? Kag sa diin ang inyo balay kang una?” pamangkot man ni Delia, nga daw nangusisa man. Sa ana hunahuna, daw bukut man ti kaharadlukan ang tawo nga dya. Kag basi kilalahay gid man sanda. Daw gwapohon kag disinti man turukun ang tawo, luwas lang sa pagka-prisko. Taas ang irong. Limpyo ang ginasoksok. Kag ang pinakaimportanti, bukut angsudun. Nakayuhum liwat si Delia kag nadumduman na ang hurubatun kang mga mal-am nga, “Ang gugma maabot lang nga daw kilat sa langit.” Kon andut amo tana dya ang nagsulud sa ana nga hunahuna.
“Ah, nadumduman ko run!” masinadyahun nga hambal kang tawo, “Ikaw gali to ang bata nga .…”
“Tony!” May nagsinggit nga bayi nga nagadalagan parapit sa anda nga lamisa. Gulpi nagtindug ang laki kag ginhakus na ang bayi. Nagtindug si Delia kag nagpanaw pagwa kang kapihan.
Nadumduman na run kon sin-o ang tawo. Si Tony. Ang pakaisa ni Claire nga miga na halin kang gamay pa sanda. Hinali nga nagragingirng ang silpon na. Si Claire ang nagatawag.
- Katapusan -