Bakasyon
ni Linda C. Arnaez-Lee
Una nga Bahin
Ginhawa ko lang ka udot kay Bruce para magtawas sa bakasyon imaw kang mga bata sa Pilipinas. Kon tana lang pasugtan, daw malaka pa sa pamata ka karbaw kag makauli kami. Mayad hay may rason ang amun pag-uli. Karaslun ang akun pinakakamagurang nga hinablus kag tanan nga miyempro kang pamilya mauli man, gani nagsugot gid man sa uruhi sa kondisyon nga mauna tana balik sa Korea. Hulyo pa lang nagbakal run kami ka tiket para makabarato. Mayad hay may promo.
Disyembre 25, 2013 ang amun uli pa Pilipinas. Adlaw gid kang Paskwa. Wara run tamun ka tambong kang Krismas party sa simbahan. Alang-alang run sa oras. Sa eroplano run lang kami namaskwa.
Pag-abot namun sa airport rugto kami nagduyu sa sangka restawran antes kami nagsaka sa departure area. Pagkaalas dos sa kasanagun nagtsek-in kami kang amun mga bagahe. Alas kwatro ang amun lupad paagto sa Iloilo. Pag-abot namun sa Iloilo pasado alas singko pa lang sa aga.
Wara ti kinalis sa kinaandan ang airport. Magahud ang mga drayber ka taxi sa pag-agaway kang pasahero. Nagabutungay ang mga porter kang mga dara bisan ginahambalan mo pa nga may abat kami. Daw maugtas kaw run sa pagpanilag. Mayad lang ginsug-alaw kami kang manayanaya nga nawung ni Neneng, Mimi, kag Kaye sa sagwa kang airport. Pagkatapos kang kupkupanay kag harkanay, naglarga kami paagto sa Antique.
Disyembre 28 ang kasal. Nangin masaku ang mga inadlaw sa paghanda. Kami ni Nene nangin masaku man sa paglagsanay saka sa ibabaw ka sofa, saka sa lamesa, kag saka sa hagdan kang ikarwa nga panalgan kang balay. Si Bruce ginpabay-an ko nga makipagsimpon imaw ang akun pamilya.
Ninang ako sa kasal kag si Nene, flower girl. Manogbitbit man kang singsing kag libro sanday Jake kag Jason, ang akun darwa ka mga bugoy. Si Bruce istambay lang, manogtulod kang stroller ni Nene ingkaso magbisyo gid man.
Natapos ang kasal kag ginpaabot liwan ang bag-ong tuig.
Masadya kag masaku ang tanan. Duro ang ginbakal namun nga mga palupok. Duro man ginhanda nga mga pagkauon. Pag-abot kang alas dose sa tungang gabii, nagrinagaak lang ang mga palupok sa palibot. Nagpalupok man kami, ambay kon ano ngaran kang mga palupok ngato. Basta kon sindihan mo, nagasirit paibabaw kag rugto malupok. May dya man nga nagaporma lang lain-lain nga mga korte kag nagasabwag kang lain-lain nga mga duag. Daw mga bulak nga kalayo. Si Dadang indi pa kuntento, nagbuul ka labador kag ginpatik. Daw libagun pa gani ang huni. Si Karlo, ang akun hinablus, nagpaandar kang anang motorsiklo. Kag ang mga bata nagturotot kag nagsindi kang pasirit. Masadya ang tanan kapin pa ang mga Koreano hay wara nanda dya naagyan sa Korea. Nagtiraw man magsindi ang mga Koreano. Abaw! Wara gid tana nahadluk si Bruce magsindi. Daw gasindi lang kang kingki. Si Manong Seongyon tana (bana ni Nenet) pagkatapos sindi dayon na dalagan kag magkuub. Karadlaw kami tanan maglantaw kana. Pagkaaga, nag-uli kami sa Pantao, rugto sa balay ni Tatay sa uma.
Gusto gid nanda sa Pantao kapin pa kang mga bata. Malapad ang sular kang balay, ano pa pagusto sanda ka lumbayag. Pagkatapos igma, nagsipal kami ka kliber-kliber, butungay kalat, kag parumbaanay nga nagasuksok kang sako. Nasadyahan gid ang tanan. Ako kag si Nene manog-isip kag manoghusgar kon sin-o daug.
Sa Korea, husto lang sanda magpindot kang anda mga silpon indi gani kompyuter kag Nintendo. Wara kaw run ti istoryahun hay ang tanan masaku ka pindot. Lain tana sa Pantao, wara tuod ti internet pero indi mabaydan ang kalipay nga anda nabatyagan kang magsipal sanda. Nagkaraloslos ang puroy ni Nong Teks ka sobra butung ni Biboy kang magsipal kang butung-butungay nga ang ginagamit ang anda nga mga alima kag butkun nga ginakaput kag ginasabud sa hawak kang isara kag isara. Daw mapatay ako ka kadlaw kang makita ko nga nagaligid run si Bruce. Natumba run sanda pero wara gyapon nahukas ang mga nagalambid nga alima kag butkon kag sigi gyapon kapyot kag butungay. Si Junjun tana batiis run ni Manong na Ambin ang ana ginabutung. Naganganga-nganga man si Tatay ka kadlaw nga nagalantaw kanamun.
Pagkasunod nga adlaw, Enero dos, nagbalik kami sa San Jose. Mahimus pa kang mga darar-un hay mauna balik si Bruce sa Korea.
Enero tres, adlaw kang pagbalik ni Bruce kaimaw na si Hyeongbo (Manong), ang bana ni Dang. Ginhatud namun sanda sa Manila. Amo man to nga adlaw maabot ang akun mga estudyante halin sa Pusan. Malagaw kami sa Palawan kag Boracay. Imaw ko maghatud si Kaye nga akun hinablus kag Stephen nga akun abyan.
Kang makasulud run sanda para magpila sa immigration, nanaog kami nga tatlo sa arrival area. Rugto kami nag-istambay sa sangka café sa airport. Daw sa mga pisu kami nga nagasiburo sa karamig kang aircon.
- Sundi ang kasugpon kang atun sugidanun -
Pagkasunod nga adlaw, Enero dos, nagbalik kami sa San Jose. Mahimus pa kang mga darar-un hay mauna balik si Bruce sa Korea.
Enero tres, adlaw kang pagbalik ni Bruce kaimaw na si Hyeongbo (Manong), ang bana ni Dang. Ginhatud namun sanda sa Manila. Amo man to nga adlaw maabot ang akun mga estudyante halin sa Pusan. Malagaw kami sa Palawan kag Boracay. Imaw ko maghatud si Kaye nga akun hinablus kag Stephen nga akun abyan.
Kang makasulud run sanda para magpila sa immigration, nanaog kami nga tatlo sa arrival area. Rugto kami nag-istambay sa sangka café sa airport. Daw sa mga pisu kami nga nagasiburo sa karamig kang aircon.
- Sundi ang kasugpon kang atun sugidanun -
* Litrato 1: Halin sa http://definitelyfilipino.com/blog/2011/11/21/buhay-na-buhay-ang-mga-palarong-pilipino-sa-ibat-ibang-lugar-sa-pinas/.
* Litrato 2: Ginapanag-iyahan kang tagsulat.
* Litrato 2: Ginapanag-iyahan kang tagsulat.