Ang Bangungot nga si Haiyan
ni Maria Milagros C. Geremia-Lachica
Wara ikaw gin-agda Pero daw nangin halangdun nga bisita Tungud ginpanghandaan ang imo aragyan Kag ang oras kang imo paghapit ginbantayan; Ginpangilala paagi sa satellite Ang imo maraw-ay, sangka mata nga itsura Bukay, gatiringkarag nga buhok Haros nagtabon sa mapa kang Pilipinas; Wara ikaw gin-agda Ugaring nag-abot ikaw, naghapit gid Pinakasupug nga bangungot, sa pagkangiridlis Sa pagkaharadluk, sa pagkasubu Tungud ang tanan nagabugtaw nga ayhan Nagapaminsar, nagapangamuyo, nagapangabay Nga raad sanda mahamuuk lang nga nagakaturog Kag ang nagakaratabo nga kahalitan Sangka bangungot lamang Kag ang tanan mabalik sa kinaandan Sa andang pagbugtaw; Wara ikaw gin-agda Gani ang tanan nalipay, nagpasalamat Sa imo madasig nga paghalin kag pagpanaw Ugaring ang bangungot nga imo gintuga Nagapabilin, nagapadayon pa Makangiridlis, sa pagkasubu; Malisud, tuman ka rayu ang kaagahun Sa mga ginabangungot nga nagabugtaw. |
* Litrato: Himo ni Tim Timmerman halin sa http://abiggerworldyet.wordpress.com/2010/01/26/the-coming-storms/.