Petromaks
ni Mark Anthony Q. Orquejo
Athag pa sa akun paminsarun hasta kadya ang sangka butang nga nagtugro kang kasanag sa amun magamay nga balay. Kang gamay pa ako, ang amun balay nabugsok sa atubang kang malapad nga taramnan kag ginapalibutan kang kadulum sa kada kagab-ihun. Ugaring ginaiwagan man dya kang kasanag nga angay kang bulan nga wara’t untat ang pag-ugsad.
Petromaks kadya ang anang ngaran. Nagakalangkag gid ako sa pag-abot kang kagab-ihun hay masaksihan ko ruman ang makarilingaw nga kasilaw kang petromaks. Nagakabanga gid ako sa paglantaw kon paano dya ni Tatay pasigahun. Kon kaisa, nagatiriripon kami nga magburugto sa atubang kang petromaks agud mamati kang mga dumaan nga istorya nanday Nanay kag Tatay. Masami namun pamatian ang mga sugidanun parti sa aswang, gani kada tapos ka istorya, wara run kami nagagwa sa balay hay basi may nagahulat nga aswang sa gawang. Ang akun mga amigo nga nagaagto sa balay agud mamati, daw indi run man mag-uruli.
Wara namun tanto nabatyagan ang kamingaw, hay may petromaks kami nga nagatugro kang kalipay. Sa sulud kang amun magamay nga balay, mga kadlawanay kag istoryahanay ang nagsirbe nga musika sa amun pamatin-an.
Nangin kabahin kang kabuhi namun ang petromaks. Matuod dya para sa mga panimalay nga wara madangati kang kuryente parehas kanamun. Amo gani nga ang petromaks, para kanamun nga mga taga-uma, ginakabig namun nga miyembro kang amun pamilya.
* Litrato: Halin sa http://www.wetcanvas.com/forums/showthread.php?t=545354.