Turo kang Uran sa Dagmay
ni Mark Anthony Q. Orquejo
Sa tyempo kang madulum nga kalangitan, amo man ang pagturo kang uran. Turo nga nagadara kang kasubu sa kadam-an, ilabi run gid sa mga baratyagun nga ginlabo kang nagligad. Ang uran daw mga bala nga sa kada tupa sa lupa, kuriit sa itsura nagapalhit. Maluya ang kabug-usan kang lawas hay tungud sa uran, ang tagipusuon ana ginapilasan.
Ang uran pinitensya sa iba kon kabigun, hay dya nagasirbe nga ispiho kang andang masakit nga kahapon. Ang baratyagun nga ginpreso sa baul kang malawid nga tinion, sa uran nakakita kang rason nga ipakigbato ang anang kahilwayan bisan pa masakitan ang tawo nga natungdan.
Sa panglantaw kang kadam-an, ang uran gamhanan. Pero may mga butang nga indi na madutlan. Parehas lamang kang dahon kang dagmay nga bisan ano ka turo kang uran, ang pagkabasa, hapus na nga malikawan. Bala man nga makabig ang uran, ang dahon dagmay indi mapilasan.
Ang dagmay may kaisug magsuray pero ang pagkabasa kana indi makita. Ang katawhan pwedi mangin amo man kadya para kon magbalik ang sakit nga hatud kang andang kahapon, may yuhum nga igabalon.
* Litrato himo ni Catherine K. "Kitty" Moore halin sa http://kittymooreart.blogspot.com/2012/01/taro-and-koi-painting.html.