|
Tungatunga kang kaagahun Kang ikaw akun matamwaan Sa bintana nga pwirtahan. Andut may pagsalangisag Parapit sa istatwa, nga daw may nagapohag, Kag daw may nagapangibon Nga mapintas nga mga haron? Ang plasa, daw haros ko lupadun Sa paglokso ka akun tagiposoon, Tungud sa mga pahanagupnup Nga di masombad, okon masintud. Tungud sa di mapatpat nga kahadluk Wara ko ikaw masog-alaw agud mahakus, Agud kon daad man mapangapinan Sa mga haron nga nagapanglisan. Kag sa kakulba, ginhawa ko nagpin-ut, Tagiposoon ko naggutuk sa akun tilaok; Paano ko pa ikaw malagas, Hay parihas ka mga haron, Sa sangka pisuk ka mata gid lamang, Ikaw ang hinali nga nagpoas? Lagsun ko man ikaw sa hangin Ka akun mga pangamoyo, Di gid mapahamtang Gaalimbokad nga pagpang-alag-ag. Sa diin bala ikaw ayhan Dinara ka mga haron, Agud silotan, kag pamatbatan, Bisan wara pa ti piho nga kasal-anan? Bisan pira pa ka siglo ang magaligad, Indi ria kanakun makapalipat, Hay sangka posod gid lamang Ang atun gintonaan. Samtang nagaginhawa ako, Ikaw pagasagapun. Sa tinoro ka oran sa kadagatan, Okon sa pilas ka hunub Ka lopa nga lohaan. Okon ayhan sa nagapadir Nga kabokidan, Okon sa dogoon nga pagbotlak Ka sirak sa morod-an. Sa sapa bala ayhan Nga ginporongporongan Ka mga kanipaan, Kag mga kawayanan. Sa maniki ayhan nga borobantud, Kon sa diin ikaw golpi lang magtohaw, Sa akun pagkapong-aw; Kag sa akun paglubas, Tagiposoon ko nagakapilas. Makita ko dayon gahapa mo nga kalo, Kag ang laohon mo nga bayo; Ayhan, nagboang run gid man ako Sa pagpaminsar kanimo. Ayhan, rugyan lang ikaw gapanariri Sa tinompok nga tompi, Nga daw sangka dagum, Sa tunga ka gabii. Nakahanda ako gihapon Nga masoyak, okon matonok, Matoltol ko lamang ikaw. Sa imong pagkamukmuk. |