|
Bag-o lang gawa natapos Ang odto-adlaw Kang nagapamati ako Ka mga limug – Mapintas nga nagakaradlawun Sa akun paminsarun. Ayhan, nagadaramgohanun lang ako bala Nga nagamokra ang mga mata, Hay makatiringil gid ang hanihani Nga daw mabaris nga istorya. Nagalumus ka tagiposoon Bisan wara pa ti tobig Nga nagalonod kanakun. Koon nanda, Nangayo kono ikaw Nga akun salonggitaun Antis magtungatunga Ang kahaponanun. Ano ang akun nga pagholag Hay priso man ako Ka nagapanakup Nga mga haron, Bisan wara pa ti rihas Nga mga salsalun. Dyanay, sogidi bi ako, han, Ka badlit ka imong kapalaran; Nakatalana bala gid man Nga ikaw pagasilotan, Paantoson, bisan wara ti kasal-anan? Rugya ako, ang imo nga “kapid,” Nagaantos ka hulat Ka piho nga mga sabat. Bisan lang ayhan Sa hani ka hangin, Hotiki man ako Nga pinalis ikaw, kon sa diin? Nag-ontat man ka gahud Mapintas nga mga limug, Piro sa akun pamatin-an, Padayon ikaw nga mabatian, Gapanawag kay Tatay, Sa sulud ka balay, Kag kay kalibaynan, Gapangayo nga boligan. |