Padya Dungug Kinaray-a 7 (2013)
Dungug Kinaray-a
Padya Dungug Kinaray-a 7 (2013)
Paindis-indis sa Sugidanun Pambata
Giya kag Pagsurundan
1. Ang paindis-indis bukas para sa tanan luwas sa mga miyembro kang Dungug Kinaray-a.
2. Ang piyesa kinahanglan nasulat sa Kinaray-a.
3. Ang piyesa kinahanglan orihinal nga obra kang tagsulat kag wara pa nabalhag, sa papel ukon sa internet. Indi pagbatunon ang piyesa nga ginlikwat (adapt) ukon ginbadbad (translate) sa Kinaray-a halin sa iba nga pulong.
4. Ang tema kang piyesa kinahanglan nagakaangay sa mga bata nga nagaedad pito hasta dose (7-12) anyos.
5. Indi pagbatunon ang piyesa nga nakaagi daug sa iba nga paindis-indis antes magsamput ang tungang gabii kang Septyembre 30, 2013.
6. Ang kada tagsulat makasumite kang isara (1) lang nga piyesa.
7. Ang piyesa kinahanglan indi magsobra sa pulo (10) ka panid nga pinaagi sa kompyuter, doble ang lat-ang, nabalhag sa papel nga nagasukol kang 8. 5x11 purgada kag may tagsangka purgada ang distansya sa kada binit. Sarang gamitun ang Arial, Times New Roman, ukon Book Antiqua nga dose (12) ang kabahulon kang letra.
8. Indi pagbatunon ang piyesa nga may ngaran, ayo, alyas, ukon ano man nga paratandaan nga nagapakilala sa tagsulat.
9. Ang piyesa kinahanglan ipadara paagi sa email sugidanun2013@dungugkinaray-a.com antes magsamput ang tungang gabii kang Septyembre 30, 2013. Magabaton kang sabat nga email ang tagsulat bilang pagpamatuod nga nabaton ang piyesa.
10. Ang piyesa kinahanglan ipadara bilang Word Document file kag kinahanglan ipadara imaw ang mga masunod: (a) mamugu nga pagpakilala kang kaugalingun (b) nahuman kag pirmado nga kopya kang Opisyal nga Pormas kang Pagpasakup.
11. Kon menor sa edad nga tagpasakup, ang Opisyal nga Pormas kang Pagpasakup kinahanglan pirmado kang ginikanan ukon legal nga manogbantay kang tagsulat. Ang pormas libre kag sarang i-download sa www.dungugkinaray-a.com. Ang pagpakilala kang kaugalingun kang tagsulat wara nagakinahanglan kang pormas kag sarang himuon sa bisan ano nga porma.
12. Ang piyesa kinahanglan magtuman kang laye kang gobyerno parti sa nabalhag nga mga butang (printed matters).
13. Ang tagsulat kinahanglan magtuman kang kasuguan nahanungod sa R. A. No. 8293 ukon Kodigo sa Pagpanag-iya kang Kinaaram (Intellectual Property Code). Sa pagpasulod kang piyesa, ang tagsulat nagapamatuod nga tana ang nagsulat kag nagapanag-iya kang piyesa. Kon sa urihi masapwan nga nagbutig ang tagsulat, pagabawiun ang padya kon nagdaug kag pabaydun kang mga damyos kag ginastos kang Dungug Kinaray-a sa pagsabat natungud sa paglapas kang laye.
14. Ang piyesa pagahukuman paagi sa mga masunod nga surundan: maathag nga pagpabutyag kang panghunahuna (35%), orihinal kag kinaugalingun nga ginsulat nga may angut sa tema (35%), kabilugan nga istilo kang pagsulat (30%).
15. Ang tagsulat kang nagdaug nga mga piyesa nagasaylo kang andang pagpanag-iya kang mga piyesa sa Dungug Kinaray-a kag sa tagdumara na nga wara ti kinahanglan nga bayad, luwas sa padya nga anda mabaton. Dya nga mga piyesa mangin propyedad kang Dungug Kinaray-a kag kang tagdumara na kag sarang nanda gamitun sa nasari-sari kag nagakaigo nga mga paagi, buruhatun, kag katuyuan.
16. Ang Dungug Kinaray-a lamang ang may kinamatarung sa pagpili kang miyembro ka Pundok kang Manoghusgar.
17. Ang Pundok kang Manoghusgar lamang ang may kinamatarung sa pagdesisyon nga indi magtugro kang padya kon suno sa anda paghukum, wara ti piyesa nga angay padag-un.
18. Ingkaso nga may magpatas sa kabilugan nga puntos kang mga piyesa, ang Puno nga Manoghusgar ang magapili kang magadaug sa nagpatas.
19. Ang desisyon ka Pundok kang Manoghusgar sarado kag indi sarang maapelar ukon maislan.
20. Ang ngaran kang mga nagdaug kag miyembro ka Pundok kang Manoghusgar pagabantala sa Oktubre 15, 2013 sa www.dungugkinaray-a.com.
21. Ang tanan nga nagpasakup makadawat kang Sertipiko sa Pagpasakup.
22. Ang tatlo ka piyesa nga makabaton kang pinakataas nga puntos magabaton kang mga masunod nga padya: P10,000 kag medalya (una nga padya), P7,000 kag medalya (ikarwa nga padya), P5,000 kag medalya (ikatlo nga padya).
23. Ang tanan nga manogpasakup, nagabaton kag nagasugot nga masunod sa bug-os nga Giya kag Pagsurundan kang Paindis-indis sa Sugidanun 2013.
* Kon may pamangkot, palihog padara kang email sa admin@dungugkinaray-a.com. I-klik ang butones sa idalum para sa PDF nga kopya kang Giya kag Pagsurundan kag Opisyal nga Pormas kang Pagpasakup.
