Ikasiyam kag Urihi nga Sugpon: Bertud kang Pagpalangga
Wara ako magguwa sa balay umpisa kang Miyerkules Santo hasta nga mag-abot kag maglabay ang Biyernes Santo nga ginapangalkagan ko.
“Nakalampuwas ako nga buhi,” ang nahambal ko nga bahul ang pasalamat.
Ang akun paglaum nga mag-ayad sa tion nga dya mas masanag pa sa sindi kang mga bombilya nga bag-ong ilis sa akun kwarto.
Ang mga bukol nga kauna daw makul sa kabahul, amat-amat nga nagkupus kag napanas. Ang nabilin amo ang mga bakiras himo sa andang pagkuyum. Gani sa akun pagbalik kay Manding Bukay, nga wara gihapon ti untat ang pagpamulong kag pagtig-ab, nagayuhum dya nga nagsugata kanakun.
“Wara run ti nabilin nga sablag sa lawas mo,” ang kuon ni Manding Bukay pagkatapos na ako tawasun.
Bisan wara na diretso nga ginhambal kanakun, nabatyagan ko nga naman-an ni Manding Bukay nga may iban pa nga surhano ang nagbulong kanakun. Pero nagpasalamat man gihapon ako sa tanan na nga bulig.
Sa gihapon, si Imak ang nag-imaw kanakun hasta sa katapusan ko nga pagbalik kay Manding Bukay.
Ginbuy-an ko ang mga pamangkutanun nga natungud sa tawo nga nagpahiwit. Ginlipatan ko man ang nagriligad agud liwat mag-umpisa kang limpyo. Naman-an ko nga luwas kadya, may mas importante pa nga mga butang sa kabuhi ang nagahulat kanakun.
Sa liwat namun nga pagsugilanun ni Pidik nga manogpakut, ginpamangkot ko tana nga wanhaw daw ginpabay-an ako kang mga anghel dela gwardya nga nakit-an na sa kilid ko kauna.
“Ang mga angheles,” ang hambal na, “pirmi nagaimaw sa tawo. Rugyan sanda sa luyo sa tanan nga tion agud magbulig, magpabaskug, kag magpaandam. Ugaring wara dya tanda ti kaugalingun nga mando. Wara dya nagapasilabut sa desisyon ukon ginabuhat kang mga tawo. Amo ria pirmi ta ikaw ginapadumdum kauna nga mangadi,” ang padayon na, “kag magtawag kananda sa tanan nga tion.”
Nagsimba ako sa pag-abot kang Domingo kang Pagkabanhaw.
“Ang mga kabulig kang Makaako maduro pero ang bulig nga nagakaangay para kanimo ipadara kag magaabot sa tion suno sa ana nga pagbuut,” ang laygay kang pari.
Nadumduman ko ang mga tawo nga ginpadara kanakun. Si Imak nga klasmit ko, ang manogpakut nga si Pidik, ang suud ko nga amigo nga si Sente, si Insong nga surhano nga taga-Kunsadan, si Tiya Carmen kag Trising, si Manang Purik, si Manding Bukay, si Tay Roque, kag si Nanay. Amo dya tanda ang mga bulig kang Makaako nga nag-abot sa tion suno sa ana nga pagbuut.
Pero sa tanan nga mga bulig, si Nanay ang wara ti kaanggid nga dampig ko. Samtang ang tanan nangampo run sa pagpadayon, ang ana paglaum tugub gihapon. Ang ana pagtuo kag pagpalangga sirak sa kadulum nga wara pagkiraw.
"Ang mga kataragman nalampasan mo tungud sa pagpalangga ni Nanay mo kanimo," ang hambal ni Manding Bukay sa urihi namun nga pag-istoryahanay.
Apat run ka Martes Santo ang nagligad. Ang mga nag-aragi, kon diin gindarawat kag ginhuman ang dya nga sugidanun, daw malus-aw run lang nga mga damguhanun. Ang mga nagkaratabo, sa umpisa tubtub sa katapusan, pagtiraw nga nagpabaskug kanakun.
Kag rugya sa atubang kang bintana kang akun opisina, nagayuhum ako samtang ginasundan ko ka turuk ang adlaw nga nagahingarup, ang akun pinsar kag tagipusuon puno kang pagtuo, paglaum, kag pagpalangga.
- Katapusan -
Litrato: Halin sa http://www.herondance.org/wp-content/uploads/2012/11/warbler_framed.jpg.