Ayam Umang
ni Linda C. Arnaez-Lee
Kon ano kadasig ang mga tikang ni Bella, doble kadasig kadya ang pitik kang anang dughan. Ginakulbaan tana maglubas sa talyer kada aga sa paghatud na kay Nonoy sa krusing para mag-iskwila. Pat-ud, rugyan liwan si Rowell nagatambay sa talyer. Hinablus dya ni Tyoy Roman nga tag-iya ka talyer kag sangka simana pa lang nga nag-abot halin sa Saudi Arabia.
Natalupangdan ni Bella nga sa kada pag-agi nanda ni Nonoy nagaturuk si Rowell kana. Piro kon sug-alawun na gani ang mga turuk, makuub dya ukon maliso kag ilikaw ang panuruk. Kon wara run tana nagaturuk, mabatyagan na ang liwan nga pagturuk ni Rowell kana.
“Tita Bells, sin-o ginalantaw mo sa talyer?” pamangkot ni Nonoy nga hinablus na samtang nagahulat sanda ka sarakyan sa krusing.
“Ha? Wara mong!” ang butig na. Piro sa pagkamatuod nagawaug ang liug na sa paglantaw sa talyer. Natingala tana kon andut wara si Rowell. Nakabatyag tana kang kasubu. Wara si Rowell kadya nga aga.
Paglumbos ka sarakyan nga ginsakyan ni Nonoy, nagpamat-ud si Bella nga magdiritso sa tindahan sa unahan. Mamakal lamang tana kang darapliun para sa igma. Lab-as pa ang mga isda kon aga.
Wara pa magpulo ka dupa ang pinanawan ni Bella, gulpi nagpundo dya. Masug-alaw na si Rowell sa dalan. Mga darwa lang ka dupa ang anda antad. Naglinagsanay ang mga balabaw sa dughan ni Bella. Nagpundo man si Rowell sa pagpanaw kang makita si Bella. Gulpi nagmara ang ana tilaok kag nagbugu ang ana dila. Gusto na managitlun kag maghambal piro nagnganga lang ang ana baba. Pariho sanda nga indi kamaan kon ano ang himuon. Daw mga gin-udum nga wara kahulag sa anda tinundugan.
Gulpi lang nagkinaran-karan ang mga tawo sa palibot.
“Ayam umang! Ayam umang! Dali palagyo kamo!” singgitan ka mga tawo.
Pagliso ni Rowell, nakita na ang madasig nga pagdalagan kang ayam nga nagalaway paagto kay Bella. Wara run ti gin-uyang nga tinion si Rowell, dinalagan na si Bella kag ginbutung dalagan pabalik sa talyer.
Pareho sanda nga nagahangus-hangus nga nagpalipud sa kilid kang talyer. Ginkub-an ni Rowell si Bella. Haros nagadut-anay ang anda mga pungyahun. Mabatyagan nanda ang nagalinagumba nga pagpitik kang andang mga dughan. Gintulod ni Bella si Rowell parayu piro ginkup-an pa gid dya ni Rowell.
“Shhh! Indi maghulag!” ang mahinay nga hambal ni Rowell.Mabatyagan na ang mainit nga ginahawa ni Rowell. Gintangra na dya kag nagsug-alaway ang anda mga panuruk. Amat-amat nga nagaparapit ang nawung ni Rowell. Wara tana ka hulag kang magduut ang malum-uk nga mga bibig ni Rowell sa ana mga bibig. Nagparanginit ang bug-os na nga lawas. Ginbarambud na ang ana mga butkun sa liug ni Rowell kag naghugut man ang paghakus ni Rowell kana. Nabatyagan na ang paghulag kang mga bibig ni Rowell. Daw sa ginasuyup ka dya ang ana mga bibig. Gintulod na parayu si Rowell kang ginkulang tana kang ginhawa.
“Wara run ang ayam umang,” mahinay na nga hambal.
Nagyuhum si Rowell kag gindapit si Bella pagwa sa kilid kang talyer.
- Katapusan -