OMG!
ni Arlene D. Nietes-Satapornvanit
Bag-o lang gid kabugtaw si Mikay kang may nanuktok sa mayor nga gawang. Wara anay tana naghulag. Nanilag dya kon manuktok liwat. Daw tama pa ka aga para may mabisita kananda. Sa sopa sa sala naturugan si Mikay. Kapoy pa ang lawas na ka saot sa anda JS Prom kabii. Hasta kadya gaaralay pa pingig na ka sobra kadlaw sa mga labutaw ka pinakatarso da nga barkada nga si Orly.
Nabatian na liwat ang panuktok. Naghinay-hinay tana parapit sa gawang agud linglingun sa buho kon sin-o. Sangka bata nga laki, daw mga walo ka tuig ang pang-idadun kag may ginabitbit nga marabilyas (pink) nga sobri.
“Ano to, To?”
“Sulat para kay Michaela Suarez,” sabat ka bata dara dawo ka sobri kay Mikay.
Ginturuk ni Mikay ang marabilyas nga sobri.
“Sin-o nagsugo kanimo?” pamangkot ni Mikay sa bata. Natingala dya kon sin-o ang nagpadara kang sulat kana.
“Karaan na ko, Nang, kon manugid ako,” sabat ka bata dayon dalagan paagto sa karsada.
Nami ang yuhum ni Mikay samtang ginabuksan ang mahamot nga sulat. Wara nakabutang kon kay sin-o halin. Hinay-hinay na nga ginhunos pagwa ang sangka panid nga papil nga marabilyas man ang kolor. Baskug ang kahamot kang papil, daw dapug kang paborito na nga agwa. Ginsinghot na pa ang papil hasta nga magpanarupsup ang kahamot sa anang irong.
Una na ginturuk ang idalum nga bahin para maman-an kon sin-o ang nagsulat. Nakasulat lang ang "OMG." Nagkurinot ang dahi na ka paminsar kon sin-o sa mga kakilala na ang may inisyal nga OMG. Daw wara tana ti madumduman. Ano abi hay daw puro hayo lang tawganay ka mga tawo sa eskwelahan da. Gin-umpisahan na ka basa ang sulat.
Day Mikay,
Kabay nga mayad ang imo pagbugtaw bisan halin pa ikaw sa pulaw. Buhay run kita nga magbarkadahay ugaring sa kabuhayun kang atun pagkilalahay, nabudlayan ako maghambal parti sa akun tuod-tuod nga baratyagun para kanimo. Gintinguhaan ko dya nga tabunan ka mga lango-lango, ugaring daw indi ko gid maagwantahan nga taguon pa. Ang akun tagipusuon buta kang baratyagun nga gusto ko ipautwas, kag kon indi ko mahimo, daw malupok gid ang akun dughan.
Amo nga naghimurat gid ako nga magsulat para mabuhinan ang pag-ararawas kang akun ginabatyag. Kabay nga paagi sa sulat nga dya, imo maman-an kon paano mo ako napalipay. Ang akun palibot nagasanag basta rugyan ikaw, amo nga gusto ko gid makaimaw ikaw pirmi. Ang imo mga kadlaw daw kanta ka tagwatiyot, amo nga gusto ko gid ikaw pakadlawun pirmi. Kada adlaw nga gaimaway kita ginasuput ko sa akun dughan ang mga matam-is mo nga yuhum kag wara’t tupung nga pagkamaalwan.
Duro pa ako gusto ipabutyag kanimo, Mikay, piro indi mag-igo kon isulat ko ang tanan sa papil nga dya. Amo nga ginapangamuyo ko nga kabay makabuul ako kang kapagrus para mangisug nga ihambal kanimo ang sulud kang akun tagipusuon.
Ang imo abyan kag admayrer,
OMG
Amo man pagbagting ka silpon ni Mikay. Ginturuk na kon sin-o ang nagatawag.
“Si Orly … OMG!”
- Katapusan -
* Litrato: Himo ni Chris Messer halin sa http://enviroftpsite.org/msart/wc_peonies.html.
RSS Feed